ஆளுநர் மாளிகை அதிருப்தி முதல் கத்தாரில் 8 இந்தியர்களுக்கு மரண தண்டனை வரை | செய்தித் தெறிப்புகள் 10 @ அக்.26, 2023

காவல் துறை மீது ஆளுநர் மாளிகை குற்றச்சாட்டு: ‘ஆளுநர் மாளிகையில் நடந்த தாக்குதல் குறித்த புகாரை காவல் துறை பதிவு செய்யவில்லை. இந்தச் சம்பவம் குறித்து தாமாக முன்வந்து பதிவு செய்யப்பட்ட புகார், ஆளுநர் மாளிகை முன்பு நடந்த தாக்குதலை சாதாரணமான நாசகார செயலாக நீர்த்துப்போகச் செய்துவிட்டது’ என்று தமிழக ஆளுநர் மாளிகை குற்றம்சாட்டியுள்ளது.

இதனிடையே, ஆளுநர் மாளிகை முன்பு பெட்ரோல் குண்டு வீசப்பட்ட வழக்கில் கைது செயய்ப்பட்டுள்ள கருக்கா வினோத் மீது அரசு அலுவலகம் மீது குண்டு வீசுதல், அரசு ஊழியர்களை பணி செய்ய விடாமல் தடுத்தல் உள்ளிட்ட 5 பிரிவுகளின் கீழ் வழக்குப் பதிவு செய்யப்பட்டுள்ளது.