முதல்வரின் காலை உணவு திட்டத்தை அனைத்து பள்ளிகளிலும் அமல்படுத்த ஆய்வு: உயர் நீதிமன்றத்தில் அரசு தகவல்

மதுரை: தூத்துக்குடியைச் சேர்ந்த பிரேசில், உயர் நீதிமன்றக் கிளையில் தாக்கல் செய்த மனுவில் கூறியிருப்பதாவது: தமிழக முதல்வரின் காலை உணவுத் திட்டத்தை தூத்துக்குடி, திருநெல்வேலி, கன்னியாகுமரி உள்ளிட்ட கடலோரக் கிராமங்களில் உள்ள அரசு உதவிபெறும் பள்ளிகளில் செயல்படுத்தினால், அதிக எண்ணிக்கையிலான சிறுவர், சிறுமிகள் பள்ளிக்குச் செல்லும் சூழல் உருவாகும்.

இவ்வாறு மனுவில் கூறப்பட்டிருந்தது.

இந்த மனு நீதிபதிகள் எம்.சுந்தர், ஆர்.சக்திவேல் அமர்வில் நேற்று விசாரணைக்கு வந்தது. அரசு ப்ளீடர் திலக்குமார் வாதிடும்போது, "காலை உணவுத் திட்டத்தை அனைத்துப் பள்ளிகளிலும்அமல்படுத்துவது குறித்து விரிவான ஆய்வு மேற்கொள்ளப்பட்டு வருகிறது. அரசின் நிதி நிலையைக் கருத்தில் கொண்டு, இந்த திட்டத்தை விரிவுபடுத்த நடவடிக்கை மேற்கொள்ளப்படும்" என்றார். தொடர்ந்து, இதைப் பதிவு செய்தநீதிபதிகள், மனுவை முடித்துவைத்து உத்தரவிட்டனர்.