ஆர்.பி.வி.எஸ்.மணியன் கைது பின்னணி முதல் மோடியின் ‘சனாதன’ கருத்து வரை | செய்தித் தெறிப்புக்கள் 10 @ செப்.14, 2023

வேங்கைவயல் விவகாரத்தில் இடைக்கால அறிக்கை தாக்கல்: வேங்கைவயலில் குடிநீர் தொட்டியில் மனித கழிவுகள் கலக்கப்பட்ட விவகாரம் தொடர்பாக விசாரணை நடத்திய நீதிபதி சத்தியநாராயணன் ஆணையத்தின் இடைக்கால அறிக்கை, சென்னை உயர் நீதிமன்றத்தில் மூடி முத்திரையிடப்பட்ட உறையில் தாக்கல் செய்யப்பட்டது.

பொது இடங்களில் விநாயகர் சிலைகள் - ஐகோர்ட் அறிவுரை: “பொது இடங்களில் விநாயகர் சிலைகளை வைத்து தேவையில்லாமல் சட்டம் - ஒழுங்கு பிரச்சினைகளை ஏற்படுத்தக் கூடாது. சிலையைப் பாதுகாக்கும் பணியில் போலீஸார் இரவு பகலாக பணிபுரிய வேண்டியதுள்ளது. இதெல்லாம் தேவையா?” என்று சென்னை உயர் நீதிமன்ற மதுரைக் கிளை குறிப்பிட்டுள்ளது.