விடுபட்டுள்ள 72 சதவீத பணியாளர்கள் ஹெபடைடிஸ்-பி தடுப்பூசி செலுத்தி கொள்ள பொது சுகாதாரத்துறை அறிவுறுத்தல்

சென்னை: தமிழகத்தில் விடுபட்டுள்ள 72 சதவீத சுகாதாரத்துறை பணியாளர்கள் விரைவாக ஹெபடைடிஸ்-பி தடுப்பூசி செலுத்தி கொள்ள வேண்டும் என்று பொது சுகாதாரத்துறை அறிவுறுத்தியுள்ளது.

உலக அளவில் ஹெபடைடிஸ்-பி வகை கல்லீரல் அழற்சியால் பாதிக்கப்பட்டு வருவது அதிகரித்துள்ளது. வரும் 2030-ம் ஆண்டுக்குள் அந்நோயை முற்றிலுமாக ஒழிக்கும் நோக்கில் தேசிய ஹெபடைடிஸ்-பி ஒழிப்புத் திட்டம் அறிமுகப்படுத்தப்பட்டது. தமிழகத்தில் அத்தகைய பாதிப்பு ஏற்பட்டவர்களை பூரணமாக குணப்படுத்தும் நோக்கில் 42 சிகிச்சை மையங்களும், சிறப்பு மையங்களும் செயல்பட்டு வருகின்றன.

இந்நிலையில், மருத்துவப் பணியாளர்களுக்கு மூன்று தவணை ஹெபடைடிஸ்-பி தடுப்பூசி செலுத்தும் திட்டம் தொடங்கப்பட்டது. அதற்கு மருத்துவப் பணியாளர்கள் போதிய ஆர்வம் காட்டவில்லை.

இதையடுத்து அனைத்து மாவட்ட சுகாதாரத் துறை அதிகாரிகளுக்கும் அறிவுறுத்தல்கள் விடுக்கப்பட்டன. ஆனாலும் தடுப்பூசி செலுத்திக் கொள்பவர்கள் எண்ணிக்கை உயரவில்லை. எனவே விரைவில் அனைவரும் ஹெபடைடிஸ்-பி தடுப்பூசி செலுத்திக் கொள்ளுமாறு பொது சுகாதாரத்துறை அறிவுறுத்தியுள்ளது.

இதுதொடர்பாக தமிழக பொது சுகாதாரத்துறை அதிகாரிகளிடம் கேட்டபோது, “கடந்த ஆண்டு செப்.7-ம் தேதி நடைபெற்ற தமிழ்நாடு சுகாதாரத் திட்ட அலுவல் கூட்டத்தில் மருத்துவப் பணியாளர்களுக்கு கல்லீரல் அழற்சி தடுப்பூசி செலுத்துவதற்கான நிலையான வழிகாட்டி நெறிமுறைகள் வெளியிடப்பட்டன. அந்த வழிகாட்டுதல்கள் சம்பந்தப்பட்ட அலுவலர்களுக்கும் அனுப்பி வைக்கப்பட்டன. ஆனால், 28 சதவீதம் பேர் மட்டுமே முறையாக ஹெபடைடிஸ்-பி தடுப்பூசி செலுத்திக் கொண்டுள்ளனர். விடுபட்ட அனைவருக்கும் உடனே தடுப்பூசி செலுத்தி, அதுகுறித்த தகவல்களை பொது சுகாதாரத் துறை இயக்குநரகத்துக்கு அனுப்புமாறு அறிவுறுத்தப்பட்டுள்ளது” என்றனர்.