புதிய தலைமைச் செயலர், டிஜிபி நியமனம் முதல் காங்கிரஸுக்கு போன் பே எச்சரிக்கை வரை: செய்தித் தெறிப்புகள் 10 @ ஜூன் 29, 2023

புதிய தலைமைச் செயலராக சிவ்தாஸ் மீனா நியமனம்: தமிழகத்தின் புதிய தலைமைச் செயலராக சிவ்தாஸ் மீனா நியமிக்கப்பட்டுள்ளார். நகராட்சி நிர்வாகத் துறை செயலராகப் பொறுப்பு வகிக்கும் சிவ்தாஸ் மீனா, தமிழகத்தின் 49-வது தலைமைச் செயலராக நியமனம் செய்யப்பட்டுள்ளார். தற்போதைய தலைமைச் செயலர் வெ.இறையன்பு வெள்ளிக்கிழமை ஒய்வு பெறுகிறார் என்பது குறிப்பிடத்தக்கது.

முதல்வர் ஸ்டாலின் முந்தைய திமுக ஆட்சியில் உள்ளாட்சித் துறை அமைச்சராக இருந்தபோது சிவ்தாஸ் மீனா அவருடன் நெருக்கமாகப் பணியாற்றிய அதிகாரி என்பதும், அதிமுக ஆட்சி அமைந்தபோது சிவ்தாஸ் மீனா அப்போதைய முதல்வர் ஜெயலலிதாவின் 4 தனிச் செயலாளர்களில் ஒருவராக இருந்தார் என்பதும் குறிப்பிடத்தக்கது.