சேனல் உலா: ‘ஈட் யுவர் கப்பா’

மேகாலயத்தைச் சேர்ந்த ஆசிரியர், சமையற் கலைஞர், யூடியூபர் எனப் பன்முகம் கொண்டவர் நம்பி ஜெஸிகா மராக். வட கிழக்கு மாநிலங்களின் அடையாள உணவாக ‘மோமோ’ தவறாகக் கட்டமைக்கப் பட்டிருக்கும் காலத்தில், ‘ஈட் யுவர் கப்பா’ என்கிற யூடியூப் அலைவரிசை மூலம் அந்த மண்ணின் உண்மையான ருசிகர உணவு வகைகளை ஆவணப்படுத்தி வருகிறார் நம்பி. பிரபல ‘மாஸ்டர் செஃப் இந்தியா சமையல்’ போட்டியில் தென்னிந்திய, வட கிழக்கு சுவையைக் கலந்து இவர் தயாரிக்கும் உணவு வகைகள் பாராட்டுகளை அள்ளுகின்றன.

ஆவணப்படுத்துதல்: ‘ஏழு சகோதரி மாநிலங்கள்’ என்றழைக்கப்படும் வட கிழக்கு மாநிலங்களில் ஒன்று மேகாலயா. அந்த மாநிலத்தின் அப்பர் ரங்சா கிராமத்தைப் பூர்விகமாகக் கொண்ட நம்பி, சென்னையில் தொடர்பியல் துறையில் மேற்படிப்பு படித்தவர். படிக்கும்போது மசாலா தோசையும் பிரியாணியும் அவரது விருப்பமானவையாக இருந்தபோதும் சொந்த மண்ணின் சுவையை அவர் சென்னையில் தேடி அலைந்திருக்கிறார். அந்தத் தேடலில் கிடைத்த ஏமாற்றம்தான், வட கிழக்கு உணவு வகைகளை ஆவணப்படுத்தும் முயற்சிக்கான காரணம் என்கிறார்.