இயற்கை 24X7 08: சாண்ட்விச் வாழ்க்கை

புவிக்கோளம் ஓர் உயிர்க்கோளம் என்று சொல்லிக்கொண்டே உயிரைப் பறித்துக் கொண்டிருக்கிறோம். புவியின் உயிரை அல்ல; நம் உயிரைத்தான். நமக்கு நாமே குழி தோண்டிக்கொள்வதில் நாம் வல்லவர்கள். நாம் தோண்டும் குழி ஒரு கிணறாக இருந்தவரை, அது நன்மை தருவதாக இருந்தது. அதுவே சுரங்கமாக மாறியபோது அது நம் சவக்குழியாகிவிட்டது.

புவியின் மையம் வரை ஒரு கிணறு தோண்டி அதில் ஒரு செங்கல்லைப் போட்டால் அது அடித்தளத்தைச் சென்றடைய 45 நிமிடங்கள் ஆகுமாம். பொதுவாகச் சுரங்கங்கள் 400 மீட்டருக்குக் கீழே செல்வதில்லை. ஆப்பிரிக்காவில் ஓரிரு தங்கச் சுரங்கங்கள் 3 கிலோமீட்டருக்கும் சற்று அதிகமாகச் சென்றுள்ளன. எனினும், புவியை ஒரு ஆப்பிளாகக் கொண்டால் நாம் அதன் தோலைக்கூடக் கீறவில்லை என்கிறார் பில் பிரைசன்.