தொல்லியல் கல்வியும் அறிவியல் தொழில்நுட்பமும்

வரலாற்றுக் காலத் தொழில்நுட்ப வளர்ச்சி உள்ளிட்ட கட்டமைப்புகளை அறிந்துகொள்ள பேருதவியாக இருப்பவை தொல்லியல் தரவுகளே. வரலாற்றில் ஏற்பட்ட மாற்றங்களைத் துல்லியமான காலக்கணிப்போடு வரலாற்றை மறுகட்டமைக்கப் பயன்படுவதே தொல்லியல். தொல்லியல் என்பது தனிப்பட்ட ஒரு துறை அல்ல; அது பல்வேறு துறைகளின் உதவியோடு ஆய்வு நோக்கில், அறிவியல் முறைப்படி செய்யப்பட வேண்டிய ஆய்வுத் தளம்.

தொல்லியல் தரவுகளைக் காலக்கணிப்பு செய்யும்போது ஒரு பகுதியின், இனத்தின் வரலாற்றைத் துல்லியமாக எடுத்துச்சொல்வது இயலாத காரியம். அந்த இடத்தில் அறிவியல் முறை சார்ந்த ஆய்வுகள் துல்லியமான காலக்கணிப்பை வழங்குகின்றன. தொல்லியல் கள ஆய்வு, அகழாய்வு உள்ளிட்டவற்றில் வளர்ச்சி அடைந்த தொழில்நுட்பங்கள் இன்று உலகளவில் பயன்படுத்தப்பட்டுவருகின்றன. தொல்லியல் ஆய்வுகள் தொடங்கிய காலத்தில் கிடைக்கக்கூடிய ஒவ்வொரு பொருளையும் ஆவணப்படுத்தி, பிறகு அவற்றை ஆய்வுக்கு உட்படுத்தி ஆய்வுகள் மேற்கொள்ளப்பட்டன.