தினமும் மனதைக் கவனி - 17: காதல் மணத்துக்கு எதிரியா நீங்கள்?

உறுதியான மனம் உடைய குழந்தைகள் தோல்வியடைந்தால் ரப்பர் பந்து மாதிரி அதிக வேகத்துடன் எழும்பிச் செயல்பட ஆரம்பிப்பார்கள். வளர்ப்பு சரியாக இருந்தால்தான் அறிவுபூர்வமாகச் சிந்தித்துச் சரியாகத் தீர்மானிப்பார்கள் குழந்தைகள்.

இப்போது கல்வியை முடித்துவிட்டு வேலை பார்த்துக்கொண்டிருக்கும் கட்டத்தில் இருக்கும் உங்கள் குழந்தைக்கு மணம் முடிக்கவேண்டும் என்று நீங்கள் ஆசைப்படுகிறீர்கள். கல்யாணம் என்று பேச்செடுத்தாலே, “இப்போ வேண்டாம்” என்று கோபப்படலாம் மகன்/மகள். அவர்களில் திருமணத்தை ஒத்திப்போடும் ரகம் சிலர்... வாழ்க்கைத் துணையை எப்படிக் கண்டுபிடிப்பது என்று குழம்புபவர் சிலர்... ஒருவரைக் காதலித்துப் பெற்றோரிடம் சொல்லத் தயங்கும் சிலர்… மொத்தத்தில் மகனுக்கு/மகளுக்குத் துணையைத் தேடிக் கொடுக்கவேண்டிய பொறுப்பு உங்களுடையது என்று நீங்கள் கருதுகிறீர்கள். ஆனால், அவர்கள் அந்தப் பொறுப்பு தன்னுடையது என்று நினைக்கலாம்.