வாசிப்பை நேசிப்போம்: தேவதைக் கதை முதல் புறநானூறு வரை

ஆடம்பரமின்றி அமைதியாக நிகழ்ந்து கொண்டிருக்கிறது வாசிப்பு எனும் ஆகப்பெரும் செயல். சிறுவயதிலிருந்தே எனக்குக் கதைகள் கேட்பதில் அவ்வளவு இஷ்டம். பாட்டி சொல்லும் நல்லதங்காள் கதை, அம்மாவின் சொந்த ஊர் கதைகள், அப்பா சொல்லும் காங்கிரஸ் தலைவர்கள் பற்றிய கதைகள் எனப் பல பரிமாணங்களில் சுவாரசியமான கதைகள். கதை கேட்கும் அல்லது சொல்லும் திறன் நிச்சயமாக வாசித்தலில் ஒரு முக்கியப் பங்காற்றுகிறது.

விடுமுறை நாள்களில் ஊருக்குச் செல்லும்போது, தாத்தா தினமும் காலையில் அவர் வாங்கும் ‘தினத்தந்தி' நாளிதழைச் சத்தமாகவும் பிழையின்றியும் வாசிக்கும் பேரக் குழந்தைக்குத் தனது டிரங்க் பெட்டியிலிருந்து ஒரு பிஸ்கட் பாக்கெட்டைப் பரிசாகத் தருவார்.