வாசிப்பை நேசிப்போம்: புனைவில் தொடங்கி வரலாற்றில் தொடர்கிறது

கதைப் புத்தகங்கள் படித்தால் பெண்கள் கெட்டுப்போய் விடுவார்கள் என்கிற கருத்துடைய மிகச் சிறிய கிராமம்தான் என்னுடைய ஊர். 10 வயதில் கட்டுரைப் போட்டி, பேச்சுப் போட்டிக்கு எழுதுவதற்காகப் பள்ளியில் உள்ள மிகச் சிறிய நூலகத்தில் புத்தகங்களைத் தேடிப்போகத் தொடங்கினேன். அப்பாவின் கடையில் இருந்து இரவில் வீட்டுக்கு வரும் ஒரு நாளிதழும் 12ஆம் வகுப்பிற்குப் பின் படிக்க வேண்டாம் எனப் படிப்பை நிறுத்தப்பட்ட அக்காவுக்காக வரும் ஒரு வார இதழுமே உலகத்துக்கான கண்ணாடி. விதிவிலக்காக அருகில் இருந்த பெரியப்பா பிள்ளைகள் வீட்டில் மறைத்துப் படித்த சில கதைப் புத்தகங்கள் விழிகளை விரியச்செய்தன.