‘இதை வீட்டிலேயே செஞ்சி கொடுங்கம்மா...’ | சமையலால் ஜெயித்த ஜெயந்தி

நாம் குயிலைத் தேடுவதில்லை, அதன் இனிமையான குரலே போதுமானதாக இருக்கிறது. ‘அம்மா சமையல் வீடியோஸ்’ யூடியூப் சேனலை நடத்திவரும் ஜெயந்தியும் குயிலைப் போலத்தான். தன் அக்கறையான குரலால் மட்டுமே பார்வையாளர்களைத் தக்கவைக்கிறார். “ரெண்டு வெங்காயம், ரெண்டு தக்காளி போதும்மா. அம்மா ரெண்டு பச்சை மிளகாய் சேர்த்திருக்கேன். உங்களுக்குக் காரத்துக்கு ஏத்த மாதிரி சேர்த்துக்கங்கம்மா” என்று அவர் செய்முறையை விவரித்தபடியே சமைக்கும்போது, அடுக்களையில் நம் பக்கத்தில் இருந்து பேசுகிற உணர்வு ஏற்படுகிறது. இதுதான் ‘அம்மா சமையல் வீடியோஸ்’ சேனல் வெற்றியின் ரகசியம்!
சென்னையைச் சேர்ந்த ஜெயந்தி, இல்லத்தரசி. 25 ஆண்டுக் கால சமையல் அனுபவத்தில் பல்வேறு வகையான உணவு வகைகளைச் சமைத்திருக்கிறார். குறிப்பாகத் தமிழ்நாட்டில் புழக்கத்தில் இருக்கும் பெரும்பாலான உணவு வகைகள் இவருக்கு அத்துப்படி. சைவம், அசைவம் இரண்டிலுமே பிரமாதப்படுத்துகிறார். இளம் தலைமுறையினர் பலரும் அடிப்படை சமையல் தெரியாமல் தவிப்பதைப் பார்த்தவர், அதற்குத் தீர்வுதரும் நோக்கத்தில் இந்த சேனலைத் தொடங்கியிருக்கிறார்.