சுடச் சுட முட்டை குல்ஃபி 

முட்டை ஆம்லேட், முட்டை கலக்கி, ஆஃப் பாயில், ஃபுல் பாயில், வேகவைத்த முட்டை, முட்டை பொடி மாஸ் என முட்டையை அடிப்படையாக வைத்துத் தயாரிக்கப்படும் பல்வேறு சிற்றுண்டி ரகங்களைக் கேள்விப்பட்டிருந்தாலும், ‘முட்டை குல்ஃபி’யை முதன் முறையாகக் கேள்விப்பட்டபோது, புதுமையாகவும் வித்தியாசமாகவும் இருந்தது!

ஆந்திர மாநிலம் நெல்லூர் மாவட்டத்திலிருக்கிறது ‘மைபாடு’ கடற்கரை. அப்பகுதியிலிருக்கும் அழகான பொழுதுபோக்கு இடமாக மைபாடு கடற்கரையை நெல்லூர் மக்கள் குறிப்பிடுகிறார்கள். நெல்லூரிலிருந்து சுமார் 25 கி.மீ. தொலைவில் உள்ள மைபாடு கடற்கரையின் அழகை ரசிக்கலாம் என மாலை வேளையில் புறப்பட்டோம். சில மீனவக் கிராமங்களைத் தாண்டியதும் கண் முன்னே அழகாய் விரிந்தது அந்தக் கடற்கரை. குழந்தைகள் முதல் பெரியவர்கள் வரை கடல் அலையில் கால் நனைத்தும், கடற்குளியல் போட்டும் மகிழ்ச்சியாகத் தங்கள் பொழுதைக் கழித்துக்கொண்டிருந்தனர்.