பெண்கள் 360: பெண்ணுரிமைக்குச் சிறை

கடந்த மே 15 முதல் சவுதி அரேபியாவில் ஏழு பெண்ணுரிமை செயற்பாட்டாளர்கள் கைது செய்யப்பட்டிருப்பதாக வளைகுடா மனித உரிமை வாரியம் தெரிவித்துள்ளது. சவுதியில் பெண்களுக்கு வாகனம் ஓட்டும் உரிமைக்காகவும் ஒரு குடும்பத்தின் பாதுகாவலராக ஆண்கள் மட்டுமே இருக்கும் முறையை ஒழிப்பதற்காகவும் போராடியவர்கள் அந்த ஏழு பெண்கள். இவர்களில் லுஜெய்ன் அல் ஹத்லொல் இரண்டாவது முறையாகக் கைது செய்யப்பட்டிருக்கிறார். ஐக்கிய அரபு நாடுகளிலிருந்து வாகனம் ஓட்டி நுழைய முயன்றதற்காக முதன்முறை அவர் கைது செய்யப்பட்டிருந்தார். அப்போது அவர் 75 நாட்கள் சிறையில் அடைக்கப்பட்டிருந்தார். ஈமான் அல்-நஃப்ஜன் எனும் பிரபல சவுதி வலைப்பூ எழுத்தாளரும் கைது செய்யப்பட்டிப்பவர்களில் அடக்கம்.

சிகரம் தொட்ட சிறுமி

ஷிவாங்கி பதக் (16) ஹரியாணாவின் ஹிஸர் நகரைச் சேர்ந்தவர். உலகின் மிக உயரமான சிகரமான எவரெஸ்ட்டின் உச்சத்தை கடந்த வாரம் தொட்டு இவர் சாதனை படைத்திருக்கிறார். மே 7 அன்று மலையேறத் தொடங்கிய ஷிவாங்கி மூன்றே நாட்களில் எவரெஸ்ட்டின் அடிவார முகாமை அடைந்தார்.

பின்பு அங்கிருந்து, கடல் மட்டத்திலிருந்து 9 கி.மீ. உயரத்தில் இருக்கும் சிகரத்தை ஆறு நாட்களில் அடைந்துள்ளார். மலையேறத் தொடங்கும் முன் காஷ்மீரில் நான்கு மாதம் மேற்கொண்ட கடுமையான பயிற்சி இதற்கு உதவியுள்ளது. எவரெஸ்ட்டைத் தொட்டதும் தன்னையறியாமல் தேசிய கீதத்தைப் பாடியதாகக் கூறுகிறார்.

யூரிக்கு வயது 97

மே 19, 1921 -ல் கலிபோர்னியாவில் பிறந்த யூரி கொச்சியாமா ஒரு ஜப்பானியர். டிசம்பர் 7, 1941 -ல் பேர்ல் ஹார்பர் மீது வீசப்பட்ட குண்டு அவரது வாழ்வைப் புரட்டிப்போட்டது. நோயாளியான அவருடைய தந்தை அன்று கைது செய்யப்பட்டார். ஓராண்டு சிறைவாசத்துக்கு பின் விடுதலையானவர், அதற்கு அடுத்த நாளே மரணத்தைத் தழுவினார். அந்த நேரம் அமெரிக்காவில் இருந்த 1,20,000 ஜப்பானியர்களை அகதி முகாமில் அடைக்க அதிபர் ரூஸ்வெல்ட் உத்தரவிட்டார்.

யூரியின் குடும்பம் வீட்டிலிருந்து வெளியேற்றப்பட்டு குதிரை தொழுவத்தில் அடைக்கப்பட்டது. சிறு வயதில் அவருக்கு ஏற்பட்ட இந்த அனுபவமும் வலியும் அவரை மனித உரிமைப் போராளியாக்கியது. 1963- ல் அவர் அமெரிக்காவின் புகழ்பெற்ற போராளியான மல்கம் எக்ஸைச் சந்தித்துள்ளார். இன்று நடக்கும் பல போராட்டங்களுக்கும் அதை முன்னெடுத்துச் செல்லும் போராளிகளுக்கும் யூரிதான் முன்னோடி. அவரது பிறந்தநாளை முன்னிட்டு கூகுள் சிறப்பு டூடுலை வெளியிட்டுள்ளது.

கோவையை அடுத்த பொள்ளாச்சி பகுதியில் உள்ள மணக்கடவு என்னும் இடத்தில் 5 ஆயிரத்துக்கும் மேற்பட்ட மலைவாழ் மக்கள் வசித்துவருகின்றனர். இந்த இடத்தில் இவர்களுக்காக மயான பூமியும் உள்ளது. மலைவாழ் மக்களின் மயானத்தை சிலர் ஆக்கிரமித்துள்ளனர். அதை மீட்பதற்கு அவர்கள் பல்வேறு வழிகளில் போராடினர். ஆனால், அது எதிர்பார்த்த வெற்றியைப் பெற்றுத்தரவில்லை. இந்நிலையில் கடந்த திங்களன்று பொங்கியெழுந்த மலைவாழ் பெண்கள் கோவை மாவட்ட ஆட்சியர் அலுவலகத்தில் இசை வாத்தியங்களுடன் தங்களின் பாரம்பரிய நடனத்தை ஆடியபடி நூதன முறையில் மனு அளித்தனர்.

வங்கதேசத்தில் உள்ள ரோஹிங்கியா அகதிகளின் குழந்தைகளைக் காப்பாற்ற வேண்டிய கடமை உலகுக்கு உண்டு. இப்போது அவர்கள் தங்கியிருக்கும் குடியிருப்பின் நிலை மிகவும் மோசமாக உள்ளது. அவர்களின் அடுத்த வேளை உணவும் இருப்பிடமும் கேள்விக்குறியாக உள்ளன. இங்கிருக்கும் குழந்தைகள் எந்த எதிர்காலமும் இல்லாமல் வாழ்ந்துகொண்டிருக்கிறார்கள். குழந்தைகளின் சிரிப்பை மீறி அவர்கள் கண்ணில் தெரியும் வெறுமையை என்னால் உணர முடிகிறது. அவர்களுக்கு நம் உதவி தேவைப்படுகிறது.

- பிரியங்கா சோப்ரா, நடிகை, யுனிசெஃப் தூதர்