வலியைப் போக்கும் நீர்க்கோவை மாத்திரை

‘பத்துப் போடுதல்’ (பற்று) எனும் மருத்துவ வழக்கு நம்மோடு நெடுங்காலமாகப் புழக்கத்தில் இருக்கிறது. தலைவலிக்கு ‘சுக்குப் பத்து’, மூட்டு வீக்கத்துக்கு ‘மூசாம்பரப் பத்து’, அடிபட்ட வீக்கத்துக்கு ‘மூலிகைக் கலவைப் பத்து’ என மூலிகைகளின் உதவியுடன் பற்றுப்போடும் முறை சில பத்தாண்டுகளுக்கு முன்பு வரை அதிகம் பின்பற்றப்பட்டது. அடிபட்ட காயங்களுக்கு மூலிகைப் பற்றிட்டு காயங்களை விரைந்து குணமாக்கச் செய்யும் மூலிகை அறிவும் நம்மிடையே நிறைந்திருந்தது.

பற்றுப் போட்டு நோய்களைக் குணமாக்கும் வெளிப்புறச் சிகிச்சை நுணுக்கங்கள் சித்த மருத்துவத்தில் ஏராளம்! உடலில் ஏற்படும் வலிக்கும் வீக்கத்துக்கும் உள்மருந்து இல்லாமலேயே பற்றுப் போடுதல் மூலமாகப் பாதிப்புகளை உடனடியாகக் குறைக்கலாம் என்பது பற்றிடுதலின் சிறப்பு. லேசான உடல் சோர்வுக்கும் களைப்பால் ஏற்படும் உடல் வலிக்கும் மருத்துவரின் பரிந்துரை இல்லாமலே மருந்தகங்களில் மாத்திரைகளை வாங்கிச் சாப்பிடும் நிலை பல மடங்கு அதிகரித்திருக்கும் சூழலில், எளிமையான பற்று மருத்துவம் பக்கவிளைவில்லாமல் பல வேதனைகளைக் குறைப்பதற்குக் கைகொடுக்கும்.