குழந்தைகளைப் புரிந்துகொள்வோம் 08 | டோக்கன் முறை: புள்ளிகளும் வெகுமதிகளும்

“அரிசி அட்டைதாரர்களுக்கு ஒரு கிலோ பச்சரிசி, ஒரு கிலோ சர்க்கரை, முழுக் கரும்பு, ஆயிரம் ரூபாய் ரொக்கப் பணம் ஆகியவை பொங்கல் பரிசாக வழங்கப்படுகிறது. இதையொட்டி இன்று டோக்கன் வழங்கும் பணி தொடங்கியது.” - இந்தச் செய்திக் குறிப்புக்கும் சொல்பேச்சு கேட்காத சிறாருக்கும் என்ன சம்பந்தம்? டோக்கன் என்கிற சொல்தான்!

கொடுக்கல்-வாங்கலின்போது ஒரு பொருளைப் பெற வழங்கப்படும் சீட்டுத் துண்டுதான் டோக்கன். இது மாதிரியான ஒரு டோக்கன் முறையைப் பயன்படுத்தி, சொல்பேச்சு கேட்காத சிறார்களின் நடத்தையைச் சீராக்க முடியும் என்பதை ஆய்வுகள் தீர்க்கமாக எடுத்துக் கூறுகின்றன. இன்னும் சொல்லப்போனால், இதுவரை கூறப்பட்ட வழிமுறைகளைவிட இந்த டோக்கன் முறை திறன் மிகுந்தது, சிறார் நடத்தையில் குறிப்பிடத்தக்க மாற்றங்களை ஏற்படுத்தவல்லது.