நீங்களே செய்யலாம் - கிறிஸ்துமஸ் பரிசு

அந்தக் காலத்தில் பாய்ன்செட்டியா என்கிற செடியின் இலைகளை கிறிஸ்துமஸ் அலங்காரத்துக்குப் பயன்படுத்துவார்கள். காரணம் இந்தச் செடியின் இலைகள் அடர் சிவப்பு நிறத்தில் கண்ணைப் பறிக்கும். அதேபோன்ற ஒரு அலங்காரச் செடியை நீங்களே செய்யலாம்.

தேவையான பொருட்கள்:

வெள்ளை அட்டை, சின்ன பேப்பர் தட்டு, பெயிண்ட், கத்தரிக்கோல், பஞ்சிங் பேட், ரிப்பன், பசை.

செய்முறை:

1 வெள்ளை அட்டையில் உங்கள் கையை வைத்து டிரேஸ் எடுத்துக்கொள்ளவும். வரைந்த கைப்பகுதியை வெட்டவும். அதே போல 15 பேப்பர் கைகளை வெட்டி எடுக்கவும்.

2 எட்டு பேப்பர் கைகளுக்குச்

சிவப்பு நிறத்திலும், மீதியிருக்கும் கைகளுக்குப் பச்சை நிறத்திலும் பெயிண்ட் அடிக்கவும்.

3 பச்சை நிற பெயிண்ட் அடிக்கப்பட்ட கைகளை, பேப்பர் தட்டின் விளிம்பைச் சுற்றி ஒட்டவும். விரல் பகுதி வெளிப்பக்கம் இருக்க வேண்டும்.

4 சிவப்பு நிற பெயிண்ட் அடிக்கப்பட்ட கைகளை, பேப்பர் தட்டின் உள்பகுதியில் படத்தில் காட்டியிருப்பதுபோல ஒட்டவும்.

5 வெள்ளை அட்டையில் சிறிய வட்டம் வரைந்து வெட்டவும். அதற்கு மஞ்சள் நிற பெயிண்ட் அடிக்கவும். அதை சிவப்பு நிற கைகளுக்கு நடுவே ஒட்டவும்.

6 பேப்பர் தட்டின் மேல்புறத்தில் பஞ்சிங் பேட் மூலம் ஓட்டை போடவும். அதன் வழியே ரிப்பனை நுழைக்கவும். உங்கள் நண்பர்களுக்குக் கொடுக்க அருமையான கிறிஸ்துமஸ் பரிசு தயார்!