தேன் மிட்டாய் 04: ஒவ்வொரு பெண்ணுக்கும் ஓர் அறை

ஆனால் அது எப்படிச் சாத்தியம்? விளையாடுகிறாயா வர்ஜீனியா உல்ஃப்? ஒவ்வொரு வீட்டிலும் உள்ள ஒவ்வொரு பெண்ணுக்கும் ஒரு தனி அறை ஒதுக்கிக் கொடுப்பது சாத்தியம் என்றா நினைக்கிறாய்? இந்த உலகில் எவ்வளவு பெண்கள் வாழ்கிறார்களோ அவ்வளவு அறைகள் வேண்டும் என்பாயா? ஏன்? அவர்களுக்குதான் வீடுகள் இருக்கின்றனவே, போதாதா? தனி அறையை வைத்துக்கொண்டு அவர்கள் என்ன செய்யப்போகிறார்கள்? சொல்லு வர்ஜீனியா.

சொல்கிறேன். அதற்கு முன்பு, இவ்வளவு கேள்விகளை எழுப்பிய உங்களுக்கு ஒரே ஒரு சின்ன கேள்வி. உங்களுக்கு ஜுடித் ஷேக்ஸ்பியர் தெரியுமா? அவரைப் பற்றிக் கேள்விப் பட்டிருக்கிறீர்களா? அவர் என்ன எழுதியிருக்கிறார், எவ்வளவு எழுதி இருக்கிறார் என்று தெரியுமா?