ஐ.டி. அண்ணாச்சியின் அலப்பறைகள்!

‘ஐ.டி. மேனேஜர் அண்ணாச்சி’ நகைச்சுவைக் கதாபாத்திரம் யூடியூபில் மிகப் பிரபலம். ஐ.டி. எனப்படும் தகவல் தொழில்நுட்பத் துறையில் நடக்கும் சுவாரசியமான விஷயங்களைப் பகடி செய்து கிச்சுகிச்சு மூட்டும் இந்த நகைச்சுவைகளுக்குச் சொந்தக்காரர் திருநெல்வேலியைச் சேர்ந்த ராம்குமார் நடராஜன். பல ஆண்டுகளாகப் பார்த்துவந்த ஐ.டி., வேலைக்கு முழுக்குப் போட்டுவிட்டு, முழு நேர ஸ்டாண்ட் அப் காமெடியனாகக் களம்கண்டு கலக்கி வருகிறார்.

எல்லாம் வைரல் ரகம்: சிறு வயது முதலே மேடைப் பேச்சுகளிலும், நகைச்சுவையிலும் ராம்குமார் கில்லாடி. பொறியியல் பட்டப்படிப்பை முடித்துவிட்டு ஐ.டி., துறையில் நுழைந்தார். கணினி முன் எட்டு மணி நேரம் உட்கார்ந்துகொண்டு வேலை செய்துவந்தார்.