விவசாயத்துக்கு உதவும் யூடியூபர்!

சமூக வலைத்தளங்களைத் திறந்தாலே யூடியூபர்களின் காணொளிகள் கொட்டிக்கிடக்கின்றன. சமையல், பயணம், சினிமா, தொழில்நுட்பம் எனத் தமிழ் யூடியூபர்கள் மத்தியில் விவசாயத்தை பற்றிப் பேசி அசத்திவருகிறார் சிவகாசி மாவட்டம் பூவாகபுரத்தைச் சேர்ந்த தினேஷ்குமார். 500-க்கும்அதிகமான காணொளிகள், 10 லட்சத்துக்கும் அதிகமான பின்தொடர்வோருடன் இவருடைய ’நவீன உழவன்’ அலைவரிசை இணையத்தில் பிரபலம்.

சந்தைப்படுத்துதல்: பட்டப்படிப்புகளை முடித்துவிட்டு மார்க்கெட்டிங் துறையில் பணியாற்றிவரும் தினேஷ்குமார் 2018இல் ‘நவீன உழவன்’ எனும் யூடியூப் அலைவரிசையைத் தொடங்கினார். இவருடைய தந்தை ராணுவத்திலிருந்து ஓய்வுபெற்றவுடன் பெற்றோர் இருவரும் சேர்ந்து விவசாயம் செய்யத் தொடங்கினர். இதைப் பார்த்துத்தான் விவசாயத்தின் மீது தினேஷுக்கு ஆர்வம் பிறந்தது.