விடைபெறும் 2022 | மைதானத்தை அதிர வைத்தவர்கள்!

விடை பெறப் போகிறது 2022. இந்த ஆண்டில் விளையாட்டுத் துறையில் அரங்கேறிய முக்கியமான சில தருணங்களைப் பார்ப்போம்.

நம்பர் ஒன்னாக ஓய்வு: 2022 ஆஸ்திரேலிய ஓபன் டென்னிஸ் மகளிர் ஒற்றையர் பிரிவில் சாம்பியன் பட்டத்தை வென்றார் ஆஷ்லே பார்ட்டி. இதன்மூலம் 44 ஆண்டுகளுக்குப் பிறகு இப்பட்டத்தை வென்ற ஆஸ்திரேலியர் என்கிற பெருமையையும் பெற்றார். 2019 பிரெஞ்சு ஓபன், 2021 விம்பிள்டன், 2022 ஆஸ்திரேலிய ஓபன் என அடுத்தடுத்து மூன்று கிராண்ட் ஸ்லாம் பட்டங்களை வென்ற ஆஷ்லே, உலகத் தரவரிசைப் பட்டியலிலும் முதலிடத்தைப் பிடித்தார். ஆனால், யாரும் எதிர்பாராதவிதமாக திடீரென ஓய்வு முடிவை அறிவித்து அதிர்ச்சியூட்டினார். டென்னிஸ் மட்டுமல்ல, கிரிக்கெட்டிலும் கில்லியான ஆஷ்லே ஓய்வை அறிவித்தபோது அவருக்கு வயது 25!