தீபாவளி: 90ஸ் கிட்ஸ் Vs 2கே கிட்ஸ் | ஈராயிரத்தில் ஒருவன்

‘தீபாவளி என்னைக்கு ப்ரோ?' என்கிற கேள்வியைக் கேட்டு முடித்ததும் ஒன்று தோன்றியது. அப்போதெல்லாம் ஒரு தீபாவளி முடிந்த அடுத்த நாளிலிருந்தே அடுத்த தீபாவளியின் நாள், கிழமையறிந்து காத்திருக்கத் தொடங்கிவிடுவோம். அந்த நாள்களில் எதிரே தென்படும் ஆடைகளை எல்லாம் மனம் மேட்சிங் கலரில் பேன்ட், ஷூ, பெல்ட்டோடு கணக்கு போட்டு, தீபாவளிக்கு எடுக்க திட்டமிடத் தொடங்கிவிடும்.

அப்படி ஒருமுறை என் தங்கை, தீபாவளிக்கு அணியவிருக்கும் ஆடையைத் தேர்வு செய்துவிட்டார். பச்சை பூப்போட்ட கவுன். உடனே, ‘ஒழுங்கு மரியாதையாக வந்து வாங்கிக் கொடு’ என மிரட்டாத குறையாக என்னையும் என் அம்மாவையும் ஆட்டோவில் ஏற்றி, கடை வாசலில் இறக்கிவிட்டார்.