2கே கிட்ஸ்களுக்குப் பூங்காற்று திரும்புமா? | ஈராயிரத்தில் ஒருவன்

வெளியை அலங்கரித்தால் ஓவியம், நேரத்தை அலங்கரித்தால் இசை என்பார்கள். உங்கள் ஹெட்போனில் பக்கத்து வீட்டு டிவியில், திருமண மண்டபத்தின் ஸ்பீக்கரில், எவரோ ஒருவரின் முணுமுணுப்பில், ஏதோவொரு மூலையில் எங்கிருந்தோ நம் காதுகளைத் தொடுகிற இசை, சடாரென நம்மை வேறொரு காலத்துக்கு, வேறொரு தருணத்துக்குத் தூக்கி வீசுவதை உணர்ந்திருக்கிறீர்களா? நேரம், காலம் மட்டுமல்லாமல் ஓர் இடம், அந்த இடத்தின் வெப்பம், குளிர், மழை, வாசம், வண்ணம் எல்லாவற்றையும்கூட அள்ளிவந்து தந்துவிட்டுப் போகும் வல்லமை கொண்டதுதான் இசை.

தூள் கேக்: எங்கள் ஊரில் பிரிட்டோ பேக்கரி இருந்தது. அங்கே கேக்கைவிட கேக் தூள் வாங்குவதற்குக் கூட்டம் அள்ளும். கேக் தூள் என்றால், கேக் தயாரிப்பில் மீதமாகும் மிச்ச சொச்சத்தை, வெட்டி எறியும் பகுதிகளை ஒரு பாக்கெட்டில் அடைத்து விற்பார்கள். அதுதான் கேக் தூள் அல்லது தூள் கேக். அப்படி ஒருநாள் மாலை கேக் தூள் வாங்க பேக்கரிக்குச் சென்றிருந்தேன். வழக்கம்போல் கூட்டம். கடைசி ஆளாகக் காசை நீட்டியபோது கேக் தூள் பாக்கெட் காலியாகியிருந்தது. ஏமாற்றம்.