பிரேக் அப் பாடம்: இது பொய் மாதிரி...

தலில் பாய் ஃபிரெண்ட் சொல்லும் வார்த்தைகளுக்கு எப்போதுமே இரண்டு அர்த்தங்கள் இருக்கலாம். சில பிரச்சினைகளைத் தவிர்ப்பதற்காக பூடகமாகப் பேசவும் செய்வார்கள். அந்த வார்த்தைகளை அப்படியே அர்த்தப்படுத்திக்கொண்டால், பின்னர் அது ஏமாற்றத்துக்கும் வழிவகுக்கலாம். பாய் ஃபிரெண்ட் சொல்லும் வார்த்தைகளுக்கு அவர்களது அகராதியில் எப்போதும் இரண்டு அர்த்தங்கள் உண்டு என்பதை நீங்கள் மறந்தால், திண்டாட்டம்தான். பொதுவாக பாய் ஃபிரெண்ட்ஸ் சொல்லும் சில பொய்கள்.

பொய்: நாம் எப்போதும் வெறும் நண்பர்கள்தான்.

அர்த்தம்: நான் உன்னுடைய பாய் ஃபிரெண்டு மாதிரிதான், ஆனால் உண்மையான பாய்ஃப்ரெண்டு இல்லை என்று அர்த்தம். இதை சில பாய் ஃபிரெண்ட் எப்போதும் சொல்லிக்கொண்டிருப்பார். இதைச் சொல்வது ஒரு பாதுகாப்புக்காகத்தான். உங்களுடைய நட்பு, காதலை நோக்கிச் செல்லுமா, செல்லாதா என அறிய வார்த்தைகளில் நூல் விட்டுப் பார்ப்பார். ஒரு வேளை, உங்கள் நட்பு அடுத்த கட்டத்துக்குப் போகவில்லையென்றால், அப்படியே நட்பைத் தொடர்வதற்கு இது ஓர் எளிமையான வழி. அதனால்தான் இந்தத் தந்திர வாக்கியத்தைப் பல பாய் ஃபிரெண்ட்ஸ் அதிகமாகச் சொல்கின்றனர்.

பொய்: நாம் தொடர்பில் இருப்போம்.

அர்த்தம்: என் நட்பைத் தொடர விரும்புகிறாயா? அப்படியானால், அதற்கான எல்லா முயற்சிகளையும் நீதான் எடுக்க வேண்டும் என்பதுதான். பொதுவாக ஒரு நட்பைத் தொடரவும், வளர்க்கவும் நிறைய முயற்சிகள் தேவை. அதுவும் வெவ்வேறு நகரங்களில் வசித்தால், கேட்கவே வேண்டாம். ஒவ்வொரு நாளும் இரவு போன் செய்து, “எப்படி இருக்கிறாய், சாப்பிட்டாயா?” என்று கேட்பதைப் பற்றி யோசிக்கக்கூட மாட்டார்கள். ஆனால், பெண்கள் நட்பு விஷயத்தில் உணர்வுப்பூர்வமாக இருப்பார்கள். கல்லூரி வாழ்க்கை முடிந்த பிறகு, அந்த நட்புத் தொடர பாய்ஸ் முயற்சிகள் எதுவும் எடுக்க மாட்டார்கள்.

பொய்: இதுதான் கடைசி.

அர்த்தம்: கடைசி என்ற வார்த்தை பாய்ஸ் அகராதியில் கிடையவே கிடையாது. ஒரு பழக்கத்தை விட்டொழிக்க அவர்களால் எளிதில் முடியாது. அது புகைபிடிக்கும் பழக்கமாக இருந்தாலும் சரி, மது அருந்தும் பழக்கமாக இருந்தாலும் சரி, ‘இதுதான் கடைசி’ என்று சொன்ன பிறகு அதை அவர்களால் பெரும்பாலும் கடைப்பிடிக்க முடிவதில்லை.

பொய்: நான் ரொம்ப நேரம் வெளியில் இருக்க மாட்டேன்.

அர்த்தம்: நான் வெளியே போகிறேன். திரும்பி வர நேரம் ஆகும். என்னைத் தொந்தரவு செய்யாதே. நண்பர்களுடன் ஜாலியாக வெளியே போகும்போது அவர்கள் பயப்படுவது, கேர்ள் ஃபிரெண்ட்டிடமிருந்து வரும் போன்களைப் பற்றியதாகத்தான் இருக்கும். அக்கறையாக நினைத்து உங்கள் பாய்ஃப்ரெண்டு வெளியில் இருக்கும்போது அடிக்கடி போன் செய்தால், அது அவருடைய சுதந்திரத்தைப் பறிப்பது போல உணருவார்கள்.

பொய்: நான் எதற்கும் அடிமை கிடையாது.

அர்த்தம்: இதற்கு உண்மையான அர்த்தம், ஒவ்வோர் ஆணும் ஏதாவது ஒரு விஷயத்துக்கு அடிமைதான். உங்கள் பாய்ஃப்ரெண்டு கிரிக்கெட், கேமிங், சினிமா என ஏதாவது ஒன்றுக்கு அடிமையாக இருக்கலாம். ஆனால், அதை உங்களிடம் ஒப்புக்கொள்ள மாட்டார்கள். அப்படி நீங்கள் கேள்வி எழுப்பினால், பொய்தான் பதிலாகக் கிடைக்கும்.

பொய்: நேற்று ஞாபகம் இருந்தது

அர்த்தம்: நான் உன்னுடைய காலண்டர் கிடையாது. உனக்கு முக்கியமான நாட்களை நான் ஞாபகத்தில் வைத்திருக்க வேண்டும் என்று அவசியம் இல்லை. பிறந்தநாள், திருமண நாள், காதல் சொன்ன நாள் என ஆண்களுக்குப் பொதுவாக எதுவுமே ஞாபகத்தில் இருக்காது. அவர்களுக்கு ஞாபக சக்தி குறைவு என்று நினைக்க வேண்டாம். பாய்ஸ் எப்போதும் முக்கியத்துவம் குறைந்த நாட்களை மறந்துவிடுவார்கள்.

பொய்: நான் டிராஃபிக்கில் மாட்டிக்கொண்டேன், வண்டி ஓட்டிக்கொண்டிருந்தேன், மீட்டிங்கில் இருந்தேன்.

அர்த்தம்: நான் பிஸியாக இல்லை. அதற்காக உன் போனை எடுக்க வேண்டுமா என்ற நினைப்புதான். பொதுவாக ‘நான் இப்போது உன்னிடம் பேசும் மனநிலையில் இல்லை’ என்பதை பாய்ஸ் அவ்வளவு எளிதில் சொல்ல மாட்டார்கள். ஆனால், மறைமுகமாகச் சொல்ல பொய்களை அவிழ்த்துவிடுவார்கள்.

பொய்: அது ஒரு பெரிய கதை தெரியுமா?

அர்த்தம்: அது ஒரு பெரிய கதைதான். ஆனால், அதை உன்கிட்ட சொல்ல முடியாது. இதற்கு அர்த்தம், எல்லாவற்றையும் உங்கள் பாய்ஃப்ரெண்டு உங்களிடம் பகிர்ந்துகொள்ள வேண்டும் என்று எதிர்ப்பார்க்கக் கூடாது என்பதுதான்.

பொய்: நான் நன்றாக இருக்கிறேன்

அர்த்தம்: நான் இங்கே மிக மோசமான நிலையில் இருக்கிறேன். ஆனால், என்னுடைய ‘ஈகோ’ அதை உன்னிடம் பகிர்ந்துகொள்ளாது. தாங்கள் பலவீனமான நிலையில் இருக்கிறோம் என்பதை பெண்களிடம் சொல்ல விரும்ப மாட்டார்கள். அதனால், பெண்கள் உதவினால்கூட அதை ஏற்கவும் மாட்டார்கள்.

பொய்: நிச்சயமாக, சரி... சரி..., ஆமாம்.

அர்த்தம்: ஒரு வரியில் சொல்லும் வார்த்தைகளுக்கு பெரிய அர்த்தம் இருக்கிறதா என்ன? பெண்கள் ஆண்களுடன் நீண்ட விவாதம் செய்யும்போது, “சரி, ஆமா, நிச்சயமா” என்று சொல்வது, நீங்கள் சொல்லும் விஷயத்துக்கு வேறுவழியில்லை என்று அர்த்தம். ஒரு வரியில் பேசும்போது பெண்கள் பேசுவதை முடித்துவிடுவார்கள் என்று ஆண்கள் நினைப்பார்கள்.