டெக் நாலெட்ஜ் 05 - ஒளிப்படங்களை மெருகேற்ற உதவும் செயலி

தொழில்முறை கேமராவுக்கு நிகரான அம்சங்கள் உள்ள கேமராக்கள் திறன்பேசியிலேயே வந்துவிட்டன. எனினும் தேவைக்கு ஏற்ப ஒளிப்படங்களை ‘எடிட்’ செய்து மெருகேற்ற ‘போட்டோஷாப்’, ‘லைட்-ரூம்’ போன்ற மென்பொருள்கள் தேவைப்படுகின்றன. இதுபோன்ற மென்பொருள்களைப் பயன்படுத்தக் கட்டணம் செலுத்த வேண்டிய தேவையும் உள்ளது. ஆனால், கட்டணமில்லாமல் திறன்பேசியிலேயே ஒளிப்படங்களை ‘எடிட்’ செய்ய நல்லதொரு செயலி உள்ளது. அது, ‘ஸ்னாப்சீட்’.

கூகுளின் தயாரிப்பு: தொழில்நுட்ப உலகின் ஜாம்பவான் என்றழைக்கப்படும் கூகுள் நிறுவனத்தின் தயாரிப்புதான் இந்த ‘ஸ்னாப்சீட்’ செயலி. கூகுள் அறிமுகப்படுத்தியிருக்கும் மற்ற செயலிகளைப் போலவே ஒளிப்படங்களை ‘எடிட்’ செய்வதற்கான செயலியாக ‘ஸ்னாப்சீட்’ உள்ளது. ஆப்பிளின் ‘ஆப்-ஸ்டோர்’ அல்லது ஆன்ட்ராய்டின் ‘கூகுள் ப்ளே-ஸ்டோர்’ தளங்களிலிருந்து ‘ஸ்னாப்சீட்’ செயலியைப் பதிவிறக்கம் செய்யலாம்.