கமல்ஹாசன் 68: கமல் அண்ணாச்சி..

குற்றாலத்தில் ‘பாபநாசம்’ படப்பிடிப்பு. சாரல் விழுந்து கொண்டிருந்தது. சில நொடிகளில் சாரல் வலுத்து, தூறல் ஆகி, அதுவும் வலுத்து மழையானது. படப்பிடிப்பு தடைப்பட்டது. திண்ணையில் ஒதுங்கினோம். வெறிக்காத மழையை வெறித்துப் பார்த்தபடி சிறிது நேரம் நின்றுகொண்டிருந்தோம். ஏதோ பேசத்தொடங்கி எங்கெங்கோ சென்ற உரையாடல், ‘வாத்தியார்’ பாலுமகேந்திராவிடம் வந்து சேர்ந்தது. கமல் அண்ணாச்சியின் உடம்புக்குள் வாத்தியார் பாலுமகேந்திரா புகுந்துகொண்டார். கேமராவிலிருந்து இறங்கி தன் தொப்பியை சரிசெய்து கொண்டு, சற்றே சாய்த்த தோள் குலுக்கலுடன் நடந்து என் அருகில் வந்து தோளில் கை வைத்து, நடிப்பில் சிறு திருத்தம் சொல்லும் வாத்தியாரைப் போல் நடித்துக் காண்பித்தார். அந்த இடத்தில் அவர் பாலுமகேந்திரா. நான் கமல்ஹாஸன்.