அஞ்சலி: உமா ரமணன் | கூவின பூங்குயில்

பாடல் பதிவின்போது 14 டேக்குகள் எடுத்துக்கொண்டது அந்தப் பாடல். குரலுக்காக அல்ல. வாத்தியங்களின் ஒருங் கிணைப்புக்காக. பின்மதியத்தில் தொடங்கிய பாடல் பதிவு நள்ளிரவில் முடிந்தது. யாரையும் அதிகம் வாய்விட்டுப் பாராட்டாத இளையராஜா, கார் வரை வந்து அந்தப் பாடலை நன்றாகப் பாடியதாகச் சொல்கிறார். அந்தப் பாடல் ‘பன்னீர் புஷ்பங்கள்’ படத்தில் இடம்பெற்ற ‘ஆனந்த ராகம்’. பாடியவர் உமா ரமணன்.

நவம்பர் 26, 1952இல் மத்தியப் பிரதேசத்தில் பிறந்த உமா வெங்கட்ராமன் தந்தையின் பணி மாற்றம் காரணமாக மதுரைக்குக் குடும்பத்துடன் குடிபெயர, அங்கே சங்கீதம் கற்கிறார். பின்னர் சென்னை வந்தடைகிறார். இளவயதில் தந்தை இறந்ததால், குடும்பத்துக்கு விருப்பமில்லை என்கிறபோதிலும் வருவாய்க்காக மெல்லிசைக் கச்சேரிகளில் பாட வேண்டிய சூழல்.