சினிமா ரசனை 2.0 - 13: திகில் பல்கலைக்கழகம்

உலகெங்கும் திரைப்படங்களில் பல கில்லாடிகள் தோன்றி இருக்கிறார்கள். அவர்கள் எடுத்துக்கொள்ளும் திரைப்பட வகை (Genre) என்பதில் அவர்களே கில்லிகளாக விளங்குவார்கள். தங்களுக்கு முன்னர் அதே திரைப்பட வகையில் இருந்த மாஸ்டர்களின் மேதைமையை அடியொற்றி, ஆனால் சொந்தமாகச் சிந்தித்து, தங்களுக்கென்று ஒரு பாணியை உருவாக்கிக்கொண்டு அதில் பட்டையைக் கிளப்பி வந்திருக்கிறார்கள். அப்படித் தற்காலத்தில் ஹாரர் என்னும் திகில் ஜானருக்காகவே பிறந்து வந்தவர் என்று மைக் ஃப்ளானகனை (Mike Flanagan) குறிப்பிட்டுச் சொல்லலாம்.

இவரை ஜீனியஸ் என்று சொல்லமாட்டேன். ஆனால் தேர்ந்த திறமைசாலி என்று நிச்சயமாகச் சொல்லலாம். ஏனென்றால் இவர் எடுக்கத் தொடங்கிய திரைப்படங்கள், வெப் சீரீஸ்கள் (இப்போது வெப் சீரீஸ்களில்தான் மிகத் தீவிரமாகச் செயல்பட்டு வருகிறார்) ஒவ்வொன்றாகப் பெயர் வாங்கிவரும்போது, திடீரென்று சுவாரஸ்யமே இல்லாமல் எதையாவது, எப்போதாவது எடுத்துவைப்பது இவர் வழக்கம். ஆனால் அப்படிப்பட்டவை மிகக்குறைவுதான். இன்னும் சில வருடங்கள் சென்றபின்னர் மைக் ஃப்ளானகனை துல்லியமாகக் கணிக்க இயலும்.