சினிமா ரசனை 2.0 - 3: ஒரு கொலைகாரன் கலைஞன் ஆனால்..?

அவல நகைச்சுவையை அடிநாதமாகக் கொண்ட ‘Black Comedy' வகைப் படங்கள் உங்களுக்குப் பிடிக்குமா? எடுத்துக்காட்டாக, ‘சூது கவ்வும்’ படத்தில் இன்ஸ்பெக்டர் பிரம்மா தனது பின்புறத்தில் சுட்டுக்கொண்டபோது, அதிர்ச்சி அடைவதற்குப் பதிலாக உங்களுக்குச் சிரிப்பு வந்ததா? வந்தது என்றால் பிளாக் காமெடிப் படங்கள், சீரீஸ்கள் ஆகியவற்றின் நோக்கமும் அதுதான். திரையில் ஒரு கதாபாத்திரம் உயிரே போவது போன்ற சூழலில் கஷ்டப்படும்போது அதைப் பார்க்கும் நமக்குச் சிரிப்பு வரவேண்டும். எதைப் பற்றியெல்லாம் பேசுவது பிரச்சினைகளில் முடியும் என்று இருக்கிறதோ, அவற்றையெல்லாம் பகடி செய்வதே பிளாக் காமெடி.