சினிமா ரசனை 2.0 | பகுதி 1 - ‘வெஸ்டர்ன்’ என்பது ஒரு தனி உலகம்!

நமது சினிமா ரசனை 2.0 தொடரில் நாம் முதலில் பார்க்கப்போவது ஒரு தரமான OTT தொடர். 2017இல் வெளியானது. பெயர் ‘காட்லெஸ்’ (Godless). நீங்கள் ‘வெஸ்டர்ன்’ படங்களின் ரசிகராக இருந்தால், இந்த ‘வெப் சீரீஸ்’ உங்களுக்கு மிகவும் பிடிக்கும். வெஸ்டர்ன் கதைகள் என்றால் அமெரிக்க உள்நாட்டுப் போருக்கு முன்னரும் பின்னரும் தொடங்கி, பத்தொன்பது, இருபதாம் நூற்றாண்டின் சில ஆரம்ப வருடங்களில் நடந்த கதைகள்.

அமெரிக்கா உருவாகத் தொடங்கிய காலத்தில் பல புதிய நகரங்கள் முளைத்தன. அவற்றில், சட்டத்தைக் கையிலெடுத்துக்கொண்டு தன்னிச்சையாகச் செயல்படத் தொடங்கிய சமூக விரோதிகள், அவர்களை வேட்டையாடும் நபர்கள், ஊரில் சட்டத்தை நிலைநாட்டும் ஷெரீஃப், அமெரிக்க ராணுவம், பண்ணை முதலாளிகள், ரேஞ்சர்கள், மதுக் கூடங்கள், அவற்றில் நடனமாடும் பெண்கள், சட்ட அதிகாரிகள், செவ்விந்தியர்கள் எனப் பல கதாபாத்திரங்களை வைத்து உருவான மறக்க இயலாத வெஸ்டர்ன் படங்கள் ஏராளம். அதே பின்னணியில் நடக்கும் ஒரு கதையே ‘காட்லெஸ்’.