மறைநீர் என்னும் உயிர்நீர்

நாம் அன்றாடம் பயன்படுத்தும் ஒவ்வொரு பொருளிலும் நீர் இருக்கிறது. நம் கண்களுக்குத் தெரியாத அந்த நீர்தான், மறைநீர். இது ஆங்கிலத்தில் Indirect water, Virtual water, Embedded water போன்ற பல பெயர்களில் அழைக்கப்படுகிறது. சருகாகக் காய்ந்திருக்கும் காகிதத்திலும் கணினியிலும் திறன்பேசியில் கூடவா நீர் இருக்கிறது என்றால், ஆம் இருக்கிறது. ஒரு பொருளின் உற்பத்தி, தயாரிப்பு, சேவை என அனைத்து நிலைகளிலும் பயன்படுத்தப்படும் மறைநீர், அதன் கடைசிக் கண்ணியில் இருக்கும் நுகர்வோரான நம் கண்களுக்குத் தெரிவதில்லை.

உதாரணத்துக்கு, ஒரு கைப்பிடிச் சோற்றை வடிக்கச் செலவழிக்கப் படும் தண்ணீரின் அளவு எவ்வளவு எனக் கேட்டால் அரிசியைக் களையவும் அதைச் சமைக்கவும் பயன்படுத்தப் படும் தண்ணீரின் அளவைச் சொல்லிவிடுவோம். உண்மையில் விதை நெல்லில் இருந்து தொடங்குகிறது நீரின் கணக்கு. நாற்றுவிடுதல், நீர் பாய்ச்சுதல், அறுவடைக்குப் பிறகு நெல்லை வேகவைத்து அரிசியாக்குதல், அரிசியைக் கடைகளுக்குக் கொண்டு செல்வதற்கான போக்குவரத்து என ஒவ்வொரு நிலையிலும் செலவிடப்படும் தண்ணீரின் அளவு நமக்குத் தெரியாது. இவை எல்லாம் சேர்ந்ததுதான் ஒரு கைப்பிடிச் சோற்றின் மறைநீர் அளவு. இதேபோல் ஒவ்வொரு பொருளுக்கும் அளவுண்டு.