உலகம் சுற்றும் வாலிபன் 50: நெருக்கடிகளை மீறிய நெத்தியடி!

உழைக்கும் மக்களின் சினிமா ரசனையை மிக நுணுக்கமாகப் புரிந்துகொண்ட ஓர் உச்ச நட்சத்திரம் தமிழ் சினிமாவில் இருந்தார் என்றால் அவர் எம்.ஜி.ஆர் மட்டும்தான். அதற்கு மிகச் சிறந்த உதாரணமாக அமைந்த படம் ‘உலகம் சுற்றும் வாலிபன்’. அடுத்து என்ன நடக்கும் என்கிற ஆவலைத் தூண்டி, அடுத்து எந்தக் கதாநாயகியுடன், எந்த நாட்டில், எப்படிப்பட்ட நிலவெளியில் டூயட் பாடப்போகிறார் என்று எதிர்பார்க்க வைத்த ஒரு படம். அதை எம்.ஜி.ஆர். தயாரித்து, இயக்கியிருந்தார். 60 வயதை நெருங்கிக்கொண்டிருந்த வேளையில் தன்னை ‘வாலிப’னாக முன்வைக்கும் தன்னம்பிக்கையும் துணிவையும் கொடுத்தவர்கள் அவருடைய கோடிக்கணக்கான ரசிகர்கள்.