* வெப்பமண்டலப் பகுதிகளில் அதிகம் விளைவிக்கப்படும் பழங்களில் ஒன்று மாம்பழம். இது கிழக்கு இந்தியா, பர்மா, அந்தமான் தீவுகள் ஆகிய தெற்காசியப் பகுதிகளுக்குச் சொந்தமானது.
* பௌத்த துறவிகள் மாம்பழத்தை மலேசியா, கிழக்கு ஆசியாவில் கி.மு. 5 ஆம் நூற்றாண்டில் அறிமுகப்படுத்தியதாக நம்பப்படுகிறது. புத்தர் ஒரு மா மரத்தின் குளிர்ந்த நிழலில் தியானம் செய்ததாகப் புராணக்கதை கூறுகிறது.
* மா மரம் 35 - 40 மீட்டர் (115-130 அடி) உயரம் வரை வளரக்கூடியது. நீண்ட காலம் வாழும் மரம். சில மாமரங்கள் 300 ஆண்டுகளுக்குப் பிறகும் பழம் தருவதாகச் சொல்லப்படுகிறது.
* மா மரத்தின் பூக்கள் சிறியதாகவும் ஐந்து இதழ்களுடன் வெள்ளையாகவும் இருக்கும். காய்கள் உருவாகி பழுப்பதற்கு 3 முதல் 6 மாதங்கள் வரை ஆகும்.
* மாம்பழங்கள் மஞ்சள், ஆரஞ்சு, சிவப்பு, பச்சை உள்ளிட்ட பல்வேறு நிறங்களில் காணப்படுகின்றன. அதே போல வடிவங்களிலும் அளவுகளிலும் வித்தியாசமாகக் காணப்படுகின்றன.
* மாம்பழத்தில் ஏராளமான சத்துகள் உள்ளன. மாங்காயில் வைட்டமின் ‘சி’ அதிகம் இருக்கும். காய் பழுத்து பழமாக மாறும்போது பீட்டா கரோட்டின் (வைட்டமின் ஏ) அளவு அதிகமாக இருக்கும்.
* உலகில் விளைவிக்கப்படும் மாம்பழங்களில் ஏறக்குறைய பாதி அளவுக்கு இந்தியாவில் விளைகிறது. ஆனால், இந்தியாவில் விளைவிக்கப்படும் மாம்பழங்கள் பெரும்பாலும் இந்தியர்களே பயன்படுத்திக்கொள்வதால், சர்வதேச மாம்பழ வர்த்தகத்தில் ஒரு சதவீதத்துக்கும் குறைவாகவே உள்ளது.
* மாங்காய்களையும் மாம்பழங்களையும் வைத்து ஏராளமான உணவு வகைகள் தயாரிக்கப்படுகின்றன. சட்னி, தொக்கு, பச்சடி, குழம்பு, ஊறுகாய் என மாங்காய்கள் பலவிதங்களில் பயன்படுத்தப்படுகின்றன. மாம்பழங்களில் பழச்சாறு, சாஸ், இனிப்பு போன்றவை தயாரிக்கப்படுகின்றன.
* மாம்பழம் இந்தியா, பாகிஸ்தான், பிலிப்பைன்ஸ் ஆகிய நாடுகளின் தேசிய பழமாக இருக்கிறது. இது பங்களாதேஷின் தேசிய மரமாகவும் உள்ளது.
* இந்தியாவில் மாம்பழங்களும் மா இலைகளும் விசேஷங்களில் பயன்படுத்தப்படுகின்றன.
* சுவைக்கு ஏற்ப மாம்பழங்களின் விலையும் நிர்ணயிக்கப்படுகின்றன.
* மாமரத்தின் அறிவியல் பெயர் மாஞ்சிஃபெரா இண்டிகா.
* பழுத்த மாம்பழத்தில் 14 சதவீதம் சர்க்கரை இருக்கிறது.
* சிறுவர் முதல் பெரியவர் வரை அனைவராலும் விரும்பி உண்ணப்படும் பழங்களில் ஒன்று மாம்பழம்.
* இந்தியாவில் அல்போன்சா, சிந்துரா, பங்கனப்பள்ளி, ரத்னகிரி, நீலம், ஹிசாகர், மல்கோவா, கேசர், பாதாமி, மால்டா, இமாம் பசந்த், பாதிரி போன்ற மாம்பழங்கள் புகழ்பெற்றவை.