சில விநாடிகளில் முழுவதுமாக சார்ஜ் ஏறும் சூப்பர் கெபாசிட்டர்கள் பேட்டரிகளுக்கு மாற்றாகுமா?

சூப்பர் கெபாசிட்டர்கள் 1950களிலிருந்தே பயன்பாட்டில் இருக்கின்றன. ஆனால், அதன் திறனும், பயன்பாடும் சமீபத்திய ஆண்டுகளில் பரவலாக அதிகரித்துவருகிறது. இது பேட்டரியைப் போலவே ஆற்றலைச் சேமிக்கும் என்றாலும், அதன் அடிப்படைக் கோட்பாடு முற்றிலும் மாறுபட்டது.

கெபாசிட்டர் என்றால் என்ன? - சூப்பர் கெபாசிட்டர்களின் சிறப்பு என்ன என்பதை நாம் புரிந்துகொள்வதற்கு, சாதாரண கெபாசிட்டர்களின் செயல்பாடுகள் என்ன என்பதை நாம் தெரிந்திருக்க வேண்டும். நீங்கள் எப்போதாவது ஒரு கணினியின் மதர்போர்டையோ டிவியின் சர்க்யூட் போர்டையோ பார்த்திருந்தால், அதில் கெபாசிட்டரைப் பார்த்திருக்கும் சாத்தியம் உண்டு. பொதுவாக, கெபாசிட்டர் மின்சாரத்தை நிலைமின்மாற்றலாகச் சேமிக்கும். உதாரணத்துக்கு, நீங்கள் சாக்ஸ் மட்டும் அணிந்து ஒரு கம்பளத்தின் மீது நடக்கும்போது, அது நிலைமின்னாற்றலை உருவாக்கும். நீங்கள் அங்கே இருக்கும் கதவின் கைப்பிடியைத் தொடும்போது மட்டுமே, அந்த மின்சாரம் வெளியேறும். இந்த நிகழ்வில் நீங்கள் கெபாசிட்டராகச் செயல்பட்டீர்கள்.