நல்லொழுக்கப் புரட்சியாளர் 8: உண்ணக் கற்றுக் கொடுத்தல்

அறிவியல் வளர்ந்து நிற்கும் இன்றைய நிலையிலேயே எது நல்ல உணவு என்பதைப் பற்றி விவாதங்கள் நடக்கின்றன. குறிப்பாக, ஹலால் எனும் பதம் பலமுறை சர்ச்சைக்குள்ளாகிறது. ஹலால், ஹராம் ஆகிய சொற்கள் அரபு மொழிக்குச் சொந்தமானவை. ஆனால், அச்சொற்கள் குறிக்கும் பொருள் எல்லா மக்களுக்குமானவை இஸ்லாத்தைப் போல! தூய்மையானவை, அனுமதிக்கப்பட்டவை என்பதே ஹலால் என்கிற சொல்லின் பொருள். அதற்கு எதிர் பதம்தான் ஹராம். அதாவது அனுமதி மறுக்கப்பட்டவை, தூய்மையற்றவை.

எது தூய்மையற்றதோ அது ஆரோக்கியமற்றதுதான். எது தூய்மையானதோ அதுவே ஆரோக்கியமானது. “மனிதர்களே! பூமியிலுள்ள பொருள்களில் அனுமதிக்கப்பட்ட, தூய்மையானவற்றையே உண்ணுங்கள்” என்று திருக்குர் ஆன் வசனம் 2:168இல் அளவற்ற அன்பாளன் இறைவன் மக்களுக்கு அறிவுறுத்துகிறான். பொ.ஆ.(கி.பி.) 600களில் குறிப்பாக அண்ணல் நபி தோன்றிய அரபு மண்ணில் மனிதர்களின் உணவுப் பண்பாடு எவ்வாறு இருந்திருக்கும் என்பதைக் கவனத்தில் கொள்ள வேண்டும். பேரீச்சம் பழங்கள், பால், இறைச்சி போன்றவை பிரதான உணவாக இருந்தன. இறைச்சி உண்ணுவதற்கு மனம் விரும்பினால் அன்றைய அரேபியர்கள் நடப்பன, ஊர்வன என எதையும் விட்டுவிடாமல் உட்கொண்டிருக்கிறார்கள்.