இசை உலகைக் கலக்கும் பெண்கள் குழு!

இளையராஜா பாட்டுகள் வேண் டுமா? பாட்டுகள் உண்டு. பல குரல்களில் பேசி அசத்தும் மிமிக்ரி வேண்டுமா? மிமிக்ரியும் இருக்கிறது. அன்றாட அலுவல்களின் அலுப்பிலிருந்து விடுதலை பெற்று, துள்ளல் நடனம் ஆட டிஜே இசை வேண்டுமா? அதுவும் இருக்கிறது. மொத்தத்தில் இசை மழையில் நனை வதற்கான அனைத்து அம்சங்களையும் கொண்டிருக்கிறது ‘ராக்கிங் லேடிஸ் பேண்ட்.’ இசைக் குழுவில் உள்ள அனைத்துக் கலைஞர்களும் பெண்கள் என்பதைக் குழுவின் பெயரே சொல்லிவிடுகிறது.

பெண்களை மட்டுமே வைத்து ஓர் இசைக் குழுவை நடத்த வேண்டும் என்கிற எண்ணம் நீண்ட காலமாகவே தனக்கு இருந்துவந்ததால், ‘ராக்கிங் லேடிஸ் பேண்ட்’ என்கிற இசைக் குழுவை ஆரம்பித்ததாகச் சொல்கிறார் நிறுவனர் ரஞ்சிதா தேவி. மதுரையைப் பூர்விகமாகக் கொண்ட ரஞ்சிதா, ‘விருட்சா’ அறக்கட்டளையின் பொறுப்பாளராக உள்ளார். வணிக நோக்கு மட்டுமன்றி, இந்த இசைக் குழுவின் மூலம் சமூகத்துக்குப் பயனளிக்கக்கூடிய சேவைகளையும் செய்து வருகிறார் என்பது குறிப்பிடத்தக்கது.