ஆஹா, என்ன ருசி! - ரொட்டியா, எலுமிச்சை சாதமா?

மனித வாழ்க்கையில் ருசி மிக முக்கியமான பங்கு வகிக்கிறது. வீட்டில் ஒரே மாதிரியான உணவு வகைகளைச் சாப்பிட்டு அலுத்துப் போனாலும் இரண்டு நாள்களை வெளிமாநிலங்களிலோ வெளி நாடுகளிலோ கழித்துவிட்டால் போதும், நம் உணவின் அருமை புரிந்துவிடும். அதனால்தான் சிங்கப்பூர் சென்றாலும் ‘லிட்டில் இந்தியா’ வைத் தேடி ஓடுகிறார்கள்.

இப்போதெல்லாம் சிம்லாவில் இட்லி சாம்பாரும் மணாலியில் இரவில் தயிர் சாதமும்கூடக் கிடைக்கின்றன. ஆனால், சில ஆண்டுகளுக்கு முன்பு குழந்தைகள் திருவிழாவுக்காக 20 குழந்தைகளுடன் டெல்லிக்குச் சென்று, ஐந்து நாள்கள் தங்கியிருந்தபோது இவையெல்லாம் எளிதாகக் கிடைக்கவில்லை.