நம்ம ஊரு ‘பாட்டுக்காரன்!’

கடந்த சில ஆண்டுகளாக ‘பாட்காஸ்ட்’ என்கிற ஒலி வடிவம் மக்களிடத்தில் நல்ல வரவேற்பைப் பெற்றுள்ளது. வானொலி ஒலிபரப்பின் அடுத்த பரிமாணமான இந்த பாட்காஸ்ட் நிகழ்ச்சிகள் தமிழிலும் வரத் தொடங்கியுள்ளன. அந்த வகையில், இசையும் உரையாடலும் கலந்த பாணியில் ‘பாட்டுக்காரன்’ என்கிற பெயரில் பிரபல பாட்காஸ்ட் நிகழ்ச்சியைத் தொகுத்து வழங்குகிறார் தென்காசியைச் சேர்ந்த சுதிர் வியாஸ் என்கிற இளைஞர்.

தமிழும் இசையும்: வானொலியிலிருந்து சற்று மாறுபடும் பாட்காஸ்ட்களை எங்கிருந்தும் கேட்கலாம். திறன்பேசி, மடிக்கணினி இருந்தாலே போதும், தேவையான நேரம் நிகழ்ச்சிகளைப் பதிவிறக்கம் செய்து கேட்கலாம். சாமானியரும் பாட்காஸ்ட் நிகழ்ச்சியைத் தொகுத்து வழங்கலாம், பகிரலாம் என்பதுதான் இதிலுள்ள தனிச்சிறப்பு. இப்படித் தமிழ் இசைப்பாடல்களைப் பற்றி சுதிர் வியாஸ் தொடங்கிய பாட்காஸ்ட் நிகழ்ச்சியைப் பல்லாயிரம் பேர் ‘ஸ்பாட்டிஃபை’ செயலியில் பின்தொடர்கிறார்கள்.