நளி நாட்டியம் 02: சும்மா சிரிக்கத்தான் | சொர்க்கத்துக்கு டைரக்ட் டிக்கெட்!

பைக் என்பது ஒரு உன்னதத் திருப்பலிக்கான முகாந்திரம். ஆக்சிலேட்டரைத் திருகுவது எளிது. பிரேக்கைப் பிடித்து வண்டியை நிறுத்துவது கடினம் என்பது பிடிபடுவதற்குள்ளாகவே சம்பந்தப்பட்ட வாகன ஓட்டிகள் மருத்துவமனையின் அவசரசிகிச்சைப் பிரிவுக்குள் படுத்துக் கிடப்பதுதான் விந்தைகள் நிறைந்த இயற்பியல்.

தற்சமயம் அதிகம் சம்பாதிப்போர் எலும்புமுறிவு மருத்துவர்களும்; மூளை, நரம்பியல் நிபுணர்களும்தாம். இவர்களுக்கும் மோட்டார் வாகன உற்பத்திக்கும் ஒரு தொடர்பும் இல்லை. ஆனால், மேற்கண்ட இரண்டு துறைகளையும் ஒரே நேர்கோட்டில் இணைப்பவர்கள், சாலையில் அசாத்தியங்களை நிகழ்த்தும் கோஞ்சட்டைகள் எனப்படும் பைக்கர்கள்.