சரித்திர இசைப் பயணம்

இளையராஜா என்கிற இசையமைப்பாளர் தமிழ்த் திரையுலகில் காலடியெடுத்து வைத்தபோது, தனது தனி அடையாளமாக, அதுவரை கற்பனை செய்யப்படாத புதிய ஒருங்கிணைந்த உலக இசை வடிவை உருவாக்கப்போகிறார் என யாருமே எதிர்பார்த்திருக்க வாய்ப்பில்லை! அவரது பேராளுமை மிக்க 45 ஆண்டுகால இசைப் படைப்புகள் கடந்த சில ஆண்டுகளாக உலகம் முழுதும் மிகுந்த ஆச்சர்யத்துடன் ஆராய்ச்சிகளுக்கு உட்படுத்தப்பட்டு வருகின்றன.

‘அன்னக்கிளி’ மூலம் தமிழகத்தின் மூலை முடுக்கெல்லாம் ‘மச்சானை பாத்தீங்களா..’ எனப் பரபரப்பாக அறிமுகமான இவரை, கவியரசு கண்ணதாசன் ‘கண்ணா ஓடோடி வா.. ராஜா வா..’ என்று வரவேற்க, அடுத்தடுத்த படங்களில் பல்வேறு உலக இசை வடிவங்களை மிகச் சரியான விகிதத்தில் ஒன்றிணைத்து தன்னுடைய கட்டற்ற இசைஞானத்தை வெளிப்படுத்தத் தொடங்கினார்.