பிரேரக் மன்கட், நிக்கோலஸ் பூரன் அதிரடியில் ஹைதராபாத்தை வீழ்த்தியது லக்னோ அணி

ஹைதராபாத்: ஐபிஎல் டி20 கிரிக்கெட் தொடரில் சன் ரைசர்ஸ் ஹைதராபாத் அணிக்கு எதிரான ஆட்டத்தில் பிரேரக் மன்கட், நிக்கோலஸ் பூரன் ஆகியோரது அதிரடி ஆட்டத்தால் 7 விக்கெட்கள் வித்தியாசத்தில் வெற்றி பெற்றது லக்னோ சூப்பர் ஜெயண்ட்ஸ் அணி.

ஹைதராபாத்தில் உள்ள ராஜீவ்காந்தி மைதானத்தில் நேற்று நடைபெற்ற இந்த ஆட்டத்தில் முதலில் பேட் செய்த ஹைதராபாத் அணி 6 விக்கெட்கள் இழப்புக்கு 182 ரன்கள் குவித்தது. அதிகபட்சமாக ஹெய்ன்ரிச் கிளாசன் 29 பந்துகளில், 3 சிக்ஸர்கள், 3 பவுண்டரிகளுடன் 47 ரன்களும் அப்துல் சமத் 25 பந்துகளில், 4 சிக்ஸர்கள், ஒரு பவுண்டரியுடன் 37 ரன்களும், அன்மோல்பிரீத் சிங் 36 ரன்களும் விளாசினர். லக்னோ அணி தரப்பில் கிருணல் பாண்டியா 2 விக்கெட்கள் வீழ்த்தினார்.

183 ரன்கள் இலக்குடன் பேட் செய்த லக்னோ அணிக்கு தொடக்கம் சரியாக அமையவில்லை.கைல் மேயர்ஸ் 14 பந்துகளை சந்தித்து 2 ரன்னில் ஆட்டமிழந்தார். எனினும் அடுத்து களமிறங்கிய பிரேரக் மன்கட் மட்டையை சுழற்றினார். குயிண்டன் டி காக் 19 பந்தில் 29 ரன்கள் எடுத்தநிலையில் மயங்க் மார்க்கண்டே பந்தில் வெளியேறினார். 8.2 ஓவர்களில் 54 ரன்களுக்கு 2 விக்கெட்களை இழந்த நிலையில் ஸ்டாயினிஸ் களமிறங்கினார். அவர், பிரேரக் மன்கட்டுடன் இணைந்து சீராக ரன்கள் சேர்த்தார்.

ஒரு கட்டத்தில் லக்னோ அணி 15 ஓவர்களில் 2 விக்கெட்கள் இழப்புக்கு 114 ரன்கள்எடுத்திருந்தது. கடைசி 5 ஓவர்களில் வெற்றிக்கு 69 ரன்கள் தேவையாக இருந்தது. அபிஷேக் சர்மா வீசிய 16-வது ஓவரில் முதல் இரு பந்துகளை சிக்ஸருக்கு பறக்கவிட்ட ஸ்டாயினிஸ் அடுத்த பந்தில் ஆட்டமிழந்தார். 25 பந்துகளை சந்தித்த ஸ்டாயினிஸ் 40 ரன்கள் சேர்த்தார். இதையடுத்து களமிறங்கிய நிக்கோலஸ் பூரன், எஞ்சிய 3 பந்துகளையும் சிக்ஸருக்கு விளாச ஹைதராபாத் அணி அதிர்ச்சியில் உறைந்தது. ஏனெனில் இந்த ஓவரில் மட்டும் லக்னோ அணி 31 ரன்களை சேர்த்திருந்தது.

இதன் பின்னர் லக்னோ அணியின் வெற்றிஎளிதானது. நடராஜன் வீசிய அடுத்த ஓவரில் பிரேரக் மன்கட் தலா ஒரு சிக்ஸர், பவுண்டரியை விரட்ட 14 ரன்கள் கிடைத்தது. புவனேஷ்வர் குமார் வீசிய 18-வது ஓவரில் நிக்கோலஸ் பூரன் தொடர்ச்சியாக இரு பவுண்டரிகள் விரட்டினார். நடராஜன் வீசிய அடுத்த ஓவரில் நிக்கோலஸ் பூரன் சிக்ஸர் விளாச இந்த ஓவரில் 10 ரன்கள் சேர்க்கப்பட்டது.

ஃபசல்ஹக் ஃபரூக்கி வீசிய கடைசி ஓவரின் 2-வது பந்தை நிக்கோலஸ் பூரன் பவுண்டரிக்கு விரட்ட 19.2 ஓவர்களில் லக்னோ அணி 3 விக்கெட்கள் இழப்புக்கு 185 ரன்கள் எடுத்து 7 விக்கெட்கள் வித்தியாசத்தில் வெற்றி பெற்றது. பிரேரக் மன்கட் 45 பந்துகளில், 2 சிக்ஸர்கள், 7 பவுண்டரிகளுடன் 64 ரன்களும் நிக்கோலஸ் பூரன் 13 பந்துகளில், 4 சிக்ஸர்கள், 3 பவுண்டரிகளுடன் 44 ரன்களும் விளாசி ஆட்டமிழக்காமல் இருந்தனர்.

லக்னோ அணிக்கு இது 6-வதுவெற்றியாக அமைந்தது. இதன்மூலம் அந்த அணி 13 புள்ளிகளுடன்பட்டியலில் 4-வது இடத்துக்குமுன்னேறியது. அந்த அணி சிஎஸ்கேவுக்கு எதிராகமோதிய ஆட்டம் மழையால் பாதியில் கைவிடப்பட்டிருந்தது. தற்போதைய வெற்றியின் மூலம் லக்னோ அணி பிளே ஆஃப்சுற்றுக்கு முன்னேறுவதற்கான வாய்ப்பை தக்கவைத்துக்கொண்டுள்ளது. அதேவேளையில் ஹைதராபாத் அணி 7-வது தோல்வியை பதிவு செய்தது. 11 ஆட்டங்களில் விளையாடி உள்ள அந்த அணி 4 வெற்றிகளுடன் 8 புள்ளிகள் பெற்று பட்டியலில் 9-வது இடத்தில் உள்ளது.