ஆர்லியன்ஸ் மாஸ்டர்ஸ் பாட்மிண்டன் | கால் இறுதி சுற்றில் பிரியன்ஷு ரஜாவத்!

ஆர்லியன்ஸ்: ஆர்லியன்ஸ் மாஸ்டர்ஸ் பாட்மிண்டன் தொடரில் ஆடவர் ஒற்றையர் பிரிவில் இந்தியாவின் பிரியன்ஷு ரஜாவத் கால் இறுதி சுற்றுக்கு முன்னேறினார்.

பிரான்ஸ் நாட்டில் உள்ள ஆர்லியன்ஸ் நகரில் நடைபெற்று வரும் இந்தத் தொடரில் ஆடவர் ஒற்றையர் பிரிவு 2-வது சுற்றில் 58-ம் நிலை வீரரான இந்தியாவின் பிரியன்ஷு ரஜாவத், போட்டித் தரவரிசையில் முதலிடமும், உலகத் தரவரிசையில் 12-வது இடமும் வகிக்கும் ஜப்பானின் கென்டா நிஷிமோடோவை எதிர்த்து விளையாடினார்.

இதில் பிரியன்ஷு ரஜாவத் 21-8, 21-16 என்ற நேர் செட்டில் வெற்றி பெற்று கால் இறுதி சுற்றுக்கு முன்னேறினார். கால் இறுதி சுற்றில் பிரியன்ஷு ரஜாவத், சீன தைபேவின் சி.யு.ஜென்னுடன் மோதுகிறார். சி.யு.ஜென் தனது 2வது சுற்றில் இந்தியாவின் மிதுன் மஞ்சுநாத்தை 21-15, 21-19 என்ற நேர் செட்டில் தோற்கடித்தார்.