கொல்கத்தா ஆட்டம் கட்டக்கிற்கு மாற்றம்

கொல்கத்தாவில் வரும் 14-ம் தேதி நடைபெறவிருந்த கொல்கத்தா நைட் ரைடர்ஸ்-நடப்பு சாம்பியன் மும்பை இண்டியன்ஸ் இடையிலான ஐபிஎல் கிரிக்கெட் போட்டி ஒடிசா மாநிலம் கட்டக்கிற்கு மாற்றப்பட்டுள்ளது.

மே 16-ம் தேதி மக்களவைத் தேர்தல் முடிவுகள் வெளியாகவிருப்பதால் போதிய பாதுகாப்பு அளிக்க முடியாது என காவல்துறை தெரிவித்துவிட்டதால் கொல்கத்தாவில் நடைபெறவிருந்த முதல் ஆட்டம் அங்கிருந்து மாற்றப்பட்டுள்ளது.

இது தொடர்பாக மேற்கு வங்க கிரிக்கெட் சங்க இணைச் செயலர் சுபிர் கங்குலி கூறியதாவது: போட்டியை இங்கு நடத்த எங்களால் முடிந்த அளவுக்கு முயற்சி மேற்கொண்டோம். ஆனால் போலீஸார் தேர்தல் பணிகளில் ஈடுபட்டிருப்பதால் போதிய பாதுகாப்பு அளிக்க முடியாது என போலீஸ் கமிஷனர் தெரிவித்துவிட்டார் என்றார்.

இந்த சீசனில் கொல்கத்தாவில் 4 போட்டிகள் மட்டுமே நடைபெறவிருந்தன. இப்போது முதல் போட்டி கட்டக்கிற்கு மாற்றப்பட்டுவிட்டது. எஞ்சிய மூன்று போட்டிகள் மே 20, 22, 24 ஆகிய தேதிகளில் கொல்கத்தாவில் நடைபெறவுள்ளன.