இறுதிக்கு நேரடியாக முன்னேறும் முயற்சியில் சென்னை சூப்பர் கிங்ஸ்

ஐபிஎல் முதல் பிளே ஆஃப் சுற்றுப் போட்டியில் ரோஹித் சர்மா தலைமை மும்பை இண்டியன்ஸ் அணியும் தோனி தலைமை சென்னை சூப்பர் கிங்ஸ் அணியும் செவ்வாய் கிழமை மும்பை வான்கடே மைதானத்தில் மோதுகின்றன.

இதில் வெற்றி பெறும் அணி நேரடியாக இறுதிப் போட்டிக்கு முன்னேறும் அதே வேளையில் தோல்வியுறும் அணிக்கு இன்னொரு பிளே ஆஃப் போட்டி வாய்ப்பு உள்ளது. அதாவது புதன்கிழமையன்று ராயல் சாலஞ்சர்ஸ் பெங்களூரு அணியும், ராஜஸ்தான் ராயல்ஸ் அணியும் மற்றொரு பிளே ஆஃப் சுற்றில் மோதுகிறது.

இதில் வெற்றி பெறும் அணியுடன் நாளைய போட்டியில் தோல்வியடையும் அணி இரண்டாவது பிளே ஆஃப் சுற்றில் மோதவேண்டும்.

இறுதிப் போட்டி மே 24-ம் தேதி கொல்கத்தா ஈடன் கார்டன்ஸில் நடைபெறுகிறது.

மும்பையும் சென்னையும் இந்த ஐபிஎல் தொடரில் இருமுறை மோதி தலா ஒரு வெற்றியைப் பெற்றுள்ளன. முதலில் ஏப்ரல் 17-ம் தேதி மும்பையில் சென்னை சூப்பர் கிங்ஸ் அணி, மும்பையை வீழ்த்தியது. அதாவது மும்பை 183/4 என்று பெரிய இலக்கை எட்ட, துரத்திய சென்னை சூப்பர் கிங்ஸ் 16.4 ஓவர்களில் 189/4 என்று அபார வெற்றியை ஈட்டியது.

மீண்டும் சென்னையில் மே-8ல் நடைபெற்ற போட்டியில் மும்பை இந்தியன்ஸ் சென்னையை வீழ்த்தி, இந்த சீசனில் சென்னையை அதன் சொந்த மண்ணில் வீழ்த்திய பெருமையை பெற்றது.

2010, 2011 ஐபிஎல் சாம்பியன்களான சென்னை சூப்பர் கிங்ஸ் நாளைய பிளே ஆஃப் போட்டியில் புதிய தொடக்க வீரரை களமிறக்க வேண்டிய நிலை ஏற்பட்டுள்ளது. காரணம் அதிரடி வீரர் பிரெண்டன் மெக்கல்லம் இங்கிலாந்துக்கு எதிரான நியூஸிலாந்தின் டெஸ்ட் தொடருக்காக சென்று விட்டார்.

பிரெண்டன் மெக்கல்லம் 14 ஆட்டங்களில் 436 ரன்களை எடுத்துள்ளார். எனவே மைக் ஹஸ்ஸியும், டிவைன் ஸ்மித்தும் தொடக்கத்தில் இறங்கலாம் என்று எதிர்பார்க்கப்படுகிறது. சென்னையின் மற்றொரு முக்கிய வீரர் ஃபா டூ பிளெஸ்ஸிஸ் 14 ஆட்டங்களில் 313 ரன்களை இதுவரை எடுத்துள்ளார். சுரேஷ் ரெய்னா 14 ஆட்டங்களில் 321 ரன்களை பெற்றுள்ளார். தோனி 14 ஆட்டங்களில் 328 ரன்கள் எடுத்துள்ளார். இதனால் சென்னை அணியின் பேட்டிங் மெக்கல்லம் இல்லாவிட்டாலும் ஒரு வலுவான அணியாகவே தெரிகிறது. ஆனால் மெக்கல்லத்தின் தீப்பொறி பேட்டிங்கை பார்க்க வாய்ப்பில்லாமல் போயுள்ளது.

பந்து வீச்சிலும் ஐபிஎல் தொடரில் அதிக விக்கெட்டுகளைக் கைப்பற்றிய டிவைன் பிராவோ (20 விக்கெட்டுகள்), ஆஷிஷ் நெஹ்ரா (18 விக்கெட்டுகள்), ஆகியோரின் நல்ல பார்மை நம்பியுள்ளது. மேலும் அஸ்வின், ஜடேஜா, வளரும் நட்சத்திரம் பவன் நெகி ஆகியோரும் சென்னை அணியை வலுப்பெறச் செய்கின்றனர்.

மும்பை இண்டியன்ஸ் அணி தொடக்கத்தில் சொதப்பினாலும் பிற்பாடு வெற்றிகளைக் குவித்தது, குறிப்பாக சன்ரைசர்ஸ் ஹைதராபாத் அணிக்கு எதிராக நேற்று 9 விக்கெட்டுகள் வித்தியாசத்தில் பெற்ற வெற்றி, சென்னைக்கு கொஞ்சம் கலக்கத்தை ஏற்படுத்தலாம்.

நேற்று, மெக்லீனாகன் (3/16), லஷித் மலிங்கா (2/17), ஜகதீசா சுசித் (2/14) ஆகியோரின் பந்து வீச்சுக்கு சன் ரைசர்ஸ் 113 ரன்களுக்கு சுருண்டது.

தொடர்ந்து ஆடிய மும்பை இண்டியன்ஸ் தொடக்க வீரர்களான லெண்டில் சிம்மன்ஸ், மற்றும் பார்த்தீவ் படேல் ஆகியோர் 100 ரன்களுக்கான தொடக்க பார்ட்னர்ஷிப் கண்டனர். 13.5 ஓவர்களில் மும்பை இண்டியன்ஸ் வெற்றி பெற்று ஐபிஎல் அட்டவணையில் 2-ம் இடம் பெற்றது.

பந்துவீச்சில் மெக்லீனாகன், லஷித் மலிங்கா இந்தத் தொடரில் தங்களிடையே 33 விக்கெட்டுகளை பகிர்ந்து கொண்டுள்ளனர். இவர்கள் நினைத்தால் சென்னையின் வலுவான பேட்டிங் வரிசையை குலைக்க முடியும்.

அதே போல் மும்பை இண்டியன்ஸ் அணியின் லெண்டில் சிம்மன்ஸ், பார்த்திவ் படேல் தொடக்கத்துடன், நடுவரிசையில் ரோஹித் சர்மா, ராயுடு, கெய்ரன் போலார்ட், பிறகு புதுமுக அதிரடி மன்னன் ஹர்திக் பாண்டியா ஆகியோர் உள்ளனர்.

இலக்கைத் துரத்துவதில் மும்பை இண்டியன்ஸ் அணி சிறந்து விளங்குகிறது. மேலும் மும்பையில் விளையாடுவது அந்த அணிக்கு வெற்றி வாய்ப்புகளைக் கூட்டியுள்ளது.

சென்னை சூப்பர் கிங்ஸ் குறைந்த இலக்குகளையும் அபாரமாக தடுத்து இந்தத் தொடரில் வெற்றி கண்டுள்ளது. எனவே மீண்டும் ஒரு விறுவிறுப்பான ஆட்டத்தை ரசிகர்கள் எதிர்பார்க்கலாம்.

சென்னை உத்தேச அணி வருமாறு: மைக் ஹஸ்ஸி, டிவைன் ஸ்மித், ரெய்னா, டு பிளெஸ்ஸிஸ், தோனி, ஜடேஜா, அஸ்வின், பவன் நேகி, பிராவோ, நெஹ்ரா, மோஹித் சர்மா/ஈஷ்வர் பாண்டே.

மும்பை உத்தேச அணி வருமாறு: சிம்மன்ஸ், பார்த்தீவ் படேல், ரோஹித் சர்மா, ராயுடு, போலார்ட், பாண்டியா, ஹர்பஜன் சிங், சுசித், மெக்லினாகன், வினய் குமார், மலிங்கா