1,500 மீட்டரை நீந்திக் கடந்தார் 100 வயது பாட்டி

ஜப்பானில் நடைபெற்ற மூத்தோர் நீச்சல் போட்டியில் 1,500 மீட்டர் பிரிவில் பங்கேற்ற 100 வயது வீராங்கனை மியகோ நகவ்கா பந்தய தூரத்தை ஒரு மணி நேரம் 15 நிமிடம் 54.39 நொடிகளில் கடந்து அசத்தினார்.

1914-ம் ஆண்டு பிறந்த மியகோ நகவ்கா, 82 வயதில் முழங்கால் மூட்டு வலியால் அவதிப்பட்டார். அதற்கான பயிற்சியாகத்தான் நீச்சல் கற்றுக்கொண்டார். அதற்கு முன்பு வரை அவருக்கு நீச்சல் தெரியாது.

தனது 84-வது வயதில் நகவ்கா மூத்தோர் நீச்சல் போட்டியில் பங்கேற்கத் தொடங்கினார். 88-வது வயதில் 2002-ம் ஆண்டு நியூஸிலாந்தில் நடைபெற்ற உலக மூத்தோர் நீச்சல் போட்டியில் பங்கேற்று 50 மீட்டர் பேக்ஸ்ட்ரோக் பிரிவில் வெண்கலப் பதக்கம் வென்றார்.

பின்னர் 2004-ம் ஆண்டு உலக மூத்தோர் நீச்சலில், 50 மீட்டர், 100 மீட்டர், 200 மீட்டர் பிரிவுகளில் வெள்ளிப் பதக்கங்கள் வென்றார்.

தனது 90-வது வயதில் 800 மீட்டர் ஃபிரீஸ்டைல் பிரிவில் தேசிய சாதனை நிகழ்த்திய பிறகு இவருக்கு தேசிய அளவிலான கவனம் கிடைத்தது.

தனது 95-வது வயதில் மூத்தோர் நீச்சலில் 50 மீட்டர் பேக்ஸ்ட்ரோக் பிரிவில் முதல் உலக சாதனை படைத்தார். தற்போது நகவ்கா வசம் 24 உலக சாதனைகள் உள்ளன. தனது 100-வதுவயதில் 1,500 மீட்டர் பிரிவில் பங்கேற்று அசத்தியுள்ளார் நகவ்கா.