தொடர்ச்சியாக 4 தொடர்களில் இரட்டைச் சதம்: டான் பிராட்மேன், திராவிடை கடந்த கோலி

ஐதரபாத்தில் நடைபெறும் வங்கதேசத்துக்கு எதிரான டெஸ்ட் போட்டியில் விராட் கோலி மேலும் ஒரு இரட்டைச் சதம் எடுத்ததன் மூலம் சாதனைகளை நிகழ்த்தியுள்ளார்.

246 பந்துகளில் 204 ரன்களை 24 பவுண்டரிகளுடன் எடுத்து விராட் கோலி தைஜுல் இஸ்லாம் பந்தில் எல்.பி.ஆனார்.

4 தொடர்ச்சியான டெஸ்ட் தொடர்களில் இரட்டைச் சதம் அடித்து கோலி சாதனை நிகழ்த்தினார். டான் பிராட்மேன், ராகுல் திராவிட் ஆகியோர் தொடர்ச்சியாக 3 தொடர்களில் இரட்டைச் சதங்கள் எடுத்துள்ளனர். கோலியின் இந்த இரட்டைச் சத சாதனை மே.இ.தீவுகளுக்கு எதிராகத் தொடங்கியது.

கேப்டனாக விராட் கோலி 4 இரட்டைச் சதங்களை எடுத்துள்ளார், ஆனால் பிரையன் லாரா கேப்டனாக 5 இரட்டைச் சதங்களை எடுத்து சாதனையை வைத்துள்ளார். ஆஸி. தொடரில் கோலி இதனை சமன் செய்யலாம், அல்லது முறியடிக்கலாம்.

பிராட்மேன், மைக்கேல் கிளார்க், கிரேம் ஸ்மித் ஆகியோரும் நான்கு இரட்டைச் சதங்களை கேப்டனாக எடுத்துள்ளனர். இந்திய அணியைப் பொறுத்தவரை முந்தைய 31 கேப்டன்கள் சேர்ந்து 4 இரட்டைச் சதங்களையே எடுத்துள்ளனர்.

கோலி தற்போது 4 இரட்டைச் சதங்கள் எடுத்துள்ளார், ஆனால் இத்துடன் முடியப்போவதில்லை, ஆனால் இந்தியாவில் சேவாக், சச்சின் ஆகியோர் தலா 6 முறை இரட்டைச் சதங்களுக்கு அதிகமாக ரன்கள் எடுத்துள்ளனர் திராவிட் 5 முறை இரட்டைச் சதன் கடந்துள்ளார். சுனில் கவாஸ்கர் 4 முறை இரட்டைச் சதம் கடந்துள்ளார்.

வங்கதேசத்துக்கு எதிராக கோலி உட்பட 3 கேப்டன்கள் இரட்டைச் சதம் விளாசியுள்ளனர். ஸ்டீபன் பிளெமிங் 2002-ல் 204 ரன்களையும், கிரேம் ஸ்மித் 2008-ல் 232 ரன்களையும் வங்கதேசத்துக்கு எதிராக கேப்டனாக இரட்டைச் சதம் எடுத்துள்ளனர்.

கோலி, ரஹானே ஜோடி 3 முறை இரட்டைச் சத கூட்டணி அமைத்தனர், இந்த வகையில் சச்சின், கங்குலி ஜோடி சாதனையை சமன் செய்தனர்.

உள்நாட்டு சர்வதேச கிரிக்கெட் தொடர் சீசனில் 1105 ரன்கள் எடுத்து சேவாக் முன்னிலை வகித்து வந்தார், ஆனால் விராட் கோலி அவரை முறியடித்து தற்போது 1168 ரன்கள் எடுத்துள்ளார், கோலியின் சராசரி இந்த சீசனில் 89.84 என்பது குறிப்பிடத்தக்கது.