சென்னை ஓபன்: காலிறுதியில் வாவ்ரிங்கா

சென்னை ஓபன் டென்னிஸ் போட்டியில் ஸ்விட்சர்லாந்தின் ஸ்டானிஸ்லஸ் வாவ்ரிங்கா காலிறுதிக்கு முன்னேறினார். போட்டித் தரவரிசையில் முதலிடத்தில் உள்ள வாவ்ரிங்கா தனது காலிறுதிக்கு முந்தைய சுற்றில் 6-3, 6-1 என்ற நேர் செட்களில் ஜெர்மனியின் பெஞ்சமின் பெக்கரைத் தோற்கடித்தார். இந்த ஆட்டத்தின் இரு செட்களிலும் தலா இருமுறை பெக்கரின் சர்வீஸை முறியடித்தார் வாவ்ரிங்கா.

19-வது ஏர்செல் சென்னை ஓபன் டென்னிஸ் போட்டி சென்னையில் நடைபெற்று வருகிறது. தரவரிசை அடிப்படையில் நேரடியாக காலிறுதிக்கு முந்தைய சுற்றில் பங்கேற்ற வாவ்ரிங்கா, அதில் சர்வதேச தரவரிசையில் 79-வது இடத்தில் உள்ள பெக்கரை எதிர்கொண்டார்.

பெக்கர் ஆரம்பம் முதலே ஆக்ரோஷமாக ஆடினார். ஆனால் ஆரம்பத்தில் நிதானம் காட்டிய வாவ்ரிங்கா, 4-வது கேமில் ஏஸ் சர்வீஸை அடித்து அதிரடியில் இறங்கினார். 5-வது கேமில் பெக்கரின் சர்வீஸை எளிதாக முறியடித்து 3-2 என்ற கணக்கில் முன்னிலை பெற்ற வாவ்ரிங்கா, அடுத்த கேமில் மேலும் இரு ஏஸ் சர்வீஸ்களை பறக்கவிட்டார். அதில் முதல் ஏஸ் சர்வீஸ் 195 கி.மீ. வேகத்திலும், 2-வது ஏஸ் 200 கி.மீ. வேகத்திலும் சென்றன.

இதன்பிறகு 8-வது கேமில் கடுமையாகப் போராடிய பெக்கர், வாவ்ரிங்காவின் சர்வீஸைப் பிடிக்க முயன்றார். இதனால் இந்த கேம் 3 முறை டியூஸ் வரை சென்றது. எனினும் விடாப்பிடியாக போராடிய வாவ்ரிங்கா அதிவேக ஷாட்களை விளாசி, தனது சர்வீஸை மீட்டார். 9-வது கேமில் பெக்கர் மணிக்கு 210 மற்றும் 212 கி.மீ. வேகத்தில் சர்வீஸ்களை அடித்தபோதிலும், ஆக்ரோஷமாக ஆடிய வாவ்ரிங்கா 2-வது முறையாக பெக்கரின் சர்வீஸை முறியடித்து முதல் செட்டை முடிவுக்குக் கொண்டு வந்தார். 29 நிமிடங்கள் மட்டுமே நடைபெற்ற இந்த செட் 6-3 என்ற கணக்கில் வாவ்ரிங்கா வசமானது.

முதல் செட்டை இழந்ததால் 2-வது செட்டில் பதற்றத்தோடே விளையாடினார் பெக்கர். அதை சரியாகப் பயன்படுத்திக் கொண்ட வாவ்ரிங்கா, 2-வது கேமிலேயே பெக்கரின் சர்வீஸை முறியடித்து மேலும் நெருக்கடியை ஏற்படுத்தினார். 2-வது கேமில் பெக்கர் சராசரியாக 200 கி.மீ. வேகத்தில் சர்வீஸ் போட்டபோதும், அதற்கு பலன் கிடைக்கவில்லை.

4-வது கேமில் பெக்கரின் சர்வீஸை மீண்டும் முறியடிக்க வாவ்ரிங்கா முயன்றார். ஆனால் மறுமுனையில் ஆக்ரோஷமாக ஆடிய பெக்கர் கடும் போராட்டத்துக்குப் பிறகு தனது சர்வீஸை மீட்டார். இதன்பிறகு பெக்கரை அங்கும் இங்கும் ஓடவிட்டார் வாவ்ரிங்கா. இதனால் மேலும் பதற்றமடைந்த பெக்கர், 6-வது கேமில் எவ்வித போராட்டமும் இன்றி மிக சுலபமாக தனது சர்வீஸை இழந்தார். இதையடுத்து 7-வது கேமில் அபாரமாக ஆடிய வாவ்ரிங்கா, அந்த கேமோடு ஆட்டத்தை முடிவுக்குக் கொண்டு வந்தார்.

பெடேனுடன் மோதல்

53 நிமிடங்கள் மட்டுமே நடைபெற்ற இந்த ஆட்டத்தில் வாவ்ரிங்கா 4 ஏஸ்களையும், பெக்கர் இரு ஏஸ்களையும் அடித்தனர். வாவ்ரிங்கா தனது காலிறுதிச் சுற்றில் ஸ்லோவேகியாவின் அஜஸ் பெடேனை சந்திக்கிறார். முன்னதாக அஜஸ் பெடேன்-ரஷியாவின் அலெக்சாண்டர் குட்ரியாவ்ட்சேவ் இடையிலான ஆட்டத்தில் முதல் செட்டை அலெக்சாண்டர் 6-1 என்ற கணக்கில் வென்றார். 2-வது செட்டில் பெடேன் 3-0 என்ற கணக்கில் முன்னிலையில் இருந்தபோது பெடேன் விலகினார். இதையடுத்து பெடேன் வெற்றி பெற்றதாக அறிவிக்கப்பட்டார்.

300-வது வெற்றியை நோக்கி

2011 சென்னை ஓபனில் சாம்பியன் பட்டம் வென்றவரான வாவ்ரிங்கா, இந்த ஆட்டத்தில் வென்றதன் மூலம் சென்னை ஓபனில் 12-வது வெற்றியைப் பதிவு செய்துள்ளார். இதுவரை சென்னை ஓபனில் 16 ஆட்டங்களில் விளையாடியுள்ள வாவ்ரிங்கா, 4-ல் மட்டுமே தோல்வி கண்டுள்ளார். இதுவரை 299 ஏடிபி போட்டிகளில் விளையாடியுள்ள வாவ்ரிங்கா, காலிறுதியில் வெற்றி பெறும் பட்சத்தில் 300 ஏடிபி போட்டிகளில் வெற்றி கண்ட 4-வது ஸ்விட்சர்லாந்து வீரர் என்ற பெருமையைப் பெறுவார்.

வெற்றி குறித்துப் பேசிய வாவ்ரிங்கா, “இது நல்ல தொடக்கம். எனது சிறப்பான செயல்பாடு மகிழ்ச்சியளிக்கிறது. கொஞ்சம் மழை இருந்தது. சிறப்பாக விளையாட முயற்சித்தேன். சிறப்பாக விளையாடிவிட்டதாக நினைக்கிறேன்” என்றார்.