மார்ஷ், ஹெசில்வுட் பவுலிங், மேத்யூ வேட் பேட்டிங் அபாரம்: கோப்பையை வென்றது ஆஸ்திரேலியா

இறுதிப் போட்டி என்று வந்துவிட்டால் ஆஸ்திரேலியாவை அசைப்பது, வீழ்த்துவது கடினம். நேற்றும் அதுதான் நடந்தது. மே.இ.தீவுகள் அணியை 58 ரன்கள் வித்தியாசத்தில் வீழ்த்திய ஆஸ்திரேலியா முத்தரப்பு ஒருநாள் தொடரில் கோப்பையைக் கைப்பற்றியது.

பார்படாஸில் நடைபெற்ற இறுதிப் போட்டியில் டாஸ் வென்ற ஸ்மித் முதலில் பேட் செய்து 50 ஒவர்களில் ஆஸ்திரேலியா 270 ரன்கள் எடுத்தது. தொடர்ந்து ஆடிய மே.இ.தீவுகள் பிரகாசமான, தன்னம்பிக்கையான தொடக்கத்திற்குப் பிறகு மிட்செல் மார்ஷ், ஜோஸ் ஹேசில்வுட் ஆகியோரது அபாரமான பந்து வீச்சில் மளமள விக்கெட்டுகளை இழந்து கடைசியில் 212 ரன்களுக்குச் சுருண்டது. ஹேசில்வுட் 5 விக்கெட்டுகளைக் கைப்பற்றினாலும் மிட்செல் மார்ஷ் கடந்த போட்டி சத நாயகன் டேரன் பிராவோ, மற்றும் அதிரடி வீரர் மர்லன் சாமுவேல்ஸ் ஆகியோரை விரைவில் வீழ்த்தியது மே.இ.தீவுகளுக்கு மீள முடியா பின்னடைவை ஏற்படுத்தியது.

அதாவது அடுத்தடுத்த ஓவர்களில் டேரன் பிராவொ, சாமுவேல்ஸ், நன்றாக ஆடிவந்த சார்லஸ் ஆகியோரை வீழ்த்தி முதுகெலும்பை உடைத்தார் மார்ஷ். டேரன் பிராவோவுக்கு ரவுண்ட் த விக்கெட்டில் வந்து ஒரு அருமையான லெந்தில் பந்தை ஆஃப் ஸ்டம்புக்கு வெளியே வீச, அதனை ஆட டேரன் பிராவோ ஈர்க்கப்பட்டார், அதாவது ஈர்க்கச் செய்யப்பட்டார், எடுத்தது எட்ஜ், வெளியேறினார். மர்லன் சாமுவேல்ஸ், ஒரு பவுண்டரியுடன் 6 ரன்களில் இருந்தபோது, ஏற்கெனவே திட்டமிட்டபடி ஷார்ட் கவர் நிறுத்தப்பட்டது. மிட்செல் மார்ஷ் பந்தை கொஞ்சம் இழுத்து வேகம் குறைவாக வீசினார் டிரைவுக்கு கமிட் ஆகிவிட்ட சாமுவேல்ஸ் கட்டுப்படுத்த முடியவில்லை பந்தை ஆட ஷார்ட் கவரில் கேட்ச் ஆனது.

61 பந்துகளில் 4 பவுண்டரி 1 சிக்சருடன் 45 ரன்கள் எடுத்து நன்றாக ஆடிவந்த சார்லஸ், எதிர்முனையில் பிராவோ, சாமுவேல்ஸ் ஆட்டமிழந்ததையடுத்து சற்றே தளர்ச்சியடைந்த நிலையில் நேராக வந்த பந்தை கோட்டை விட எல்.பி.ஆனார். ஆனாலும் பந்து லேசாக லெக் ஸ்டம்புக்கு வெளியே செல்லும் போல் ரிப்ளேயில் தெரிந்தது. பொலார்ட் இறங்கி அருமையான ஒரு ஃபிளாட் நேர் சிக்சரும் பவுண்டரியும் அடித்து 20 ரன்கள் எடுத்த நிலையில் ஸாம்பா பந்தில் ஹேசில்வுட்டிடம் கேட்ச் கொடுத்து ஆட்டமிழந்தார்.

27.1 ஓவர்களில் 105/5 என்ற நிலையில் கேப்டன் ஜேசன் ஹோல்டர் 34 ரன்களை 3 பவுண்டரிகள் 1 சிக்சருடன் 37 பந்துகளில் எடுத்தார், நன்றாக விளையாடினார், எக்ஸ்ட்ரா கவர் பவுண்டரியும் நேர் சிக்ஸும் அபாரமானது. பிராத்வெய்ட், சுனில் நரைன் முயற்சிகள் பொழுதுபோக்காக இருந்ததே தவிர வெற்றிக்கான எந்த வித அறிகுறியும் ஏற்படவில்லை. 45.4 ஓவர்களில் 212 ரன்களுக்குச் சுருண்டது மே.இ.தீவுகள். ஹேசில்வுட் 9.4 ஓவர்களில் 50 ரன்களுக்கு 5 விக்கெடுகளை வீழ்த்தினார். ஷான் மார்ஷ் 10 ஓவர்களில் 32 ரன்களுக்கு 3 விக்கெட்டுகள். இதனால் இவர் ஆட்ட நாயகனாகத் தேர்வு செய்யப்பட, தொடர் நாயகனாக ஹேசில்வுட் தேர்வு செய்யப்பட்டார்.

முன்னதாக 31-வது ஓவரில் 152/3 என்ற நிலையிலிருந்து ஆஸ்திரேலியா அடுத்த 59 ரன்க்ளுக்கு 4 விக்கெட்டுகளை இழந்தது. பிறகு மேத்யூ வேடிற்கு சில மோசமான பந்துகளை பொலார்ட், பிராத்வெய்ட், கப்ரியேல் ஆகியோர் வீச 52 பந்துகளில் 2 பவுண்டரி 3 சிக்சருடன் 57 ரன்கள் எடுத்தார். ஸ்டார்க் 17 ரன்களுடனும் கூல்டர் நைல் 15 ரன்களும் பங்களிப்பு செய்தனர். 230-40 ரன்களுக்கு மட்டுப்பட்டிருக்க வேண்டிய ஆஸ்திரேலியா 270 ரன்களை எடுத்தது.

ஏரோன் பிஞ்ச் 41 பந்துகளில் 6 பவுண்டரி 1 சிச்சருடன் 41 ரன்கள் எடுத்து பொலார்டிடம் வீழ்ந்தார். கவாஜா 14 ரன்களுக்கு ஹோல்டரிடம் ஆட்டமிழந்து வெளியேறினார். ஸ்மித் (46), மேக்ஸ்வெல் (4) ஆகியோரை 31வது ஓவரில் முறையே 2 மற்றும் 6வது பந்துகளில் ஒரே ஓவரில் வீழ்த்தினார் கப்ரியேல். ஸ்மித்திற்கு அருமையான ஷார்ட் பிட்ச் பந்தை வீச அவர் புல் ஷாட் முயற்சியில் டாப் எட்ஜ் எடுக்க அருகிலேயே கேட்ச் கொடுத்து வெளியேறினார். மேக்ஸ்வெல்லுக்கு நல்ல பந்து, எல்.பி.ஆனார்.

இடையில் ஜார்ஜ் பெய்லி, தோனியுடன் ஆடியதன் சகவாச தோஷத்தை வெளிப்படுத்தினார். 17 பந்துகளில் 13 ரன்கள் என்று இருந்த அவர் ஒரு மெய்டன் ஓவரை அனுமதித்தார், அதன் பிறகு 27 பந்துகளில் 9 ரன்களையே அவரால் எடுக்க முடிந்தது, கடைசியில் 44 பந்துகளில் 22 ரன்கள் எடுத்து பிராத்வெய்ட் பந்தில் பவுல்டு ஆகி வெளியேறினார். இவர் ஆட்டத்தை மந்தப் படுத்திய நெருக்கடியில்தான் ஸ்மித் வெறுப்பில் அவுட் ஆனார். ஒரு வழியாக மேத்யூ வேட் அரைசதத்துடன் ஆஸ்திரேலியா 270 ரன்களை எடுத்தது. சுலைமான் பென் சிக்கனமாக வீசி 38 ரன்களுக்கு ஒரு விக்கெட்டைக் கைப்பற்றினார்.

மொத்தத்தில் இறுதிப் போட்டியில் ஆஸ்திரேலியாவை வீழ்த்துவதற்கு எந்த ஒரு அணியும் கடினமாக திட்டமிட்டு, அதனை கறாராகச் செயல்படுத்துவது அவசியம் என்பதையும் எதிரணிகள் முழு ஆதிக்கம் செலுத்தி ஆஸி.யை எழும்ப விடாமல் செய்ய வேண்டும் என்பதையும் அறிவுறுத்துகிறது.