வென்றால் நான் ஜெர்மானியன் தோற்றால் புலம்பெயர்ந்தவன்: நிறவெறிக் குற்றம்சாட்டி விலகிய ஜெர்மன் கால்பந்து நட்சத்திரம் மெசூட் ஓஸில் வேதனை

2014 உலகக்கோப்பையை ஜெர்மனி வென்ற போது முக்கிய உறுப்பினராக இருந்த வீரர் மெசூட் ஓஸில். 2018 ரஷ்ய உலகக்கோப்பையில் முதல் சுற்றிலேயே ஜெர்மனி வெளியேறியதற்கு மெசூட் ஓஸிலின் சொதப்பலான ஆட்டமும் ஒரு காரணம் என்றாலும் விமர்சனம் இவர் ஒருவர் மீதே திருப்பப்பட்டதற்கான காரணங்கள் உள்ளன.

இந்த ஒருதலைபட்சமான விமர்சனங்கள் பின்னணியில் ஜெர்மானிய நிறவெறி இருப்பதாக ‘பகீர்’ குற்றச்சாட்டை ஓசில் முன்வைத்து இனி ஜெர்மனி அணிக்கு ஆடப்போவதில்லை என்று முடிவை அறிவித்துள்ளது அங்கு பரபரப்பை ஏற்படுத்தியுள்ளது.

இவர் மீது திடீரென ஒரு விமர்சனம் எழுந்ததற்குக் காரணம் துருக்கி அதிபர் எர்டோகனுடன் மெசூட் ஓசில் புகைப்படம் எடுத்துக் கொண்டதே. இது ஜெர்மனி மீதான இவரது விசுவாசத்துக்கு எதிராகப் பார்க்கப்பட்டது.

ஆனால் ஓசில் கூறும்போது, “என் பெற்றோரின் நாடு துருக்கி” எனவே புகைப்படம் எடுத்துக் கொண்டேன் என்று கூறியுள்ளார்.

இப்போது சர்ச்சையானதையடுத்து ஜெர்மன் கால்பந்து கழகத்தில் இவருக்கு ஆதரவு இல்லாததையடுத்து ஓசில் மேலும் கூறும்போது, “வென்றால் நான் ஜெர்மானியன் தோற்றால் நான் புலம்பெயர்ந்தவன்” என்று அனைவரும் நினைக்கிறார்கள் என்று சாடினார்.

“எனக்கு 2 இருதயங்கள், ஒன்று ஜெர்மனி இன்னொன்று துருக்கி” என்றும் அவர் கூறியுள்ளார். இவர் ஜெர்மனியின் நிறவெறியைக் காரணம் காட்டி அந்த அணிக்கு ஆடமாட்டேன் என்று கூறியதையடுத்து துருக்கி நீதியமைச்சர் அப்துல்ஹமித் குல், “மெசூட் ஓஸில் முடிவை நான் வரவேற்கிறேன், பாசிசம் எனும் வைரஸுக்கு எதிராக அவர் அடித்த இந்த கோல் பாராட்டப்பட வேண்டியது” என்று எரியும் நெருப்பில் எண்ணை வார்த்துள்ளார். மேலும் ஐரோப்பாவில் பரவிவரும் இஸ்லாமிய எதிர்ப்புக்கு ஓசில் சரியான அடி கொடுத்துள்ளார் என்றும் துருக்கி அமைச்சர் ஒருவர் தெரிவித்ததும் சர்ச்சைகளை ஊதிப்பெருக்கியுள்ளது.

ஆனால் ஜெர்மனி சான்சலரான அஞ்சேலா மெர்கெல் ஓசிலைப் பாராட்டி, “ஜெர்மனி அணிக்கு இவரது பங்களிப்பு ஏராளம், இப்போது அவர் இந்த முடிவை எடுத்துள்ளார் அது மதிக்கப்பட வேண்டும்” என்று கூறியுள்ளார்.