சென்னை கிராண்ட் மாஸ்டர்ஸ் செஸ் போட்டி: 6-வது சுற்றில் அர்ஜுன் எரிகைசி தோல்வி

சென்னை: சென்னை கிராண்ட் மாஸ்டர்ஸ் செஸ் போட்டியின் 6-வது சுற்றில் இந்திய வீரர் அர்ஜுன் எரிகைசி அதிர்ச்சி தோல்வி கண்டார்.

இந்தியாவின் வலுவான கிளாசிக்கல் செஸ் போட்டியான சென்னை கிராண்ட் மாஸ்டர்ஸ் 2-வது பதிப்பு சென்னை கோட்டூர்புரத்தில் உள்ள அண்ணா நூற்றாண்டு நூலகத்தில் நடைபெற்று வருகிறது.

நேற்று நடைபெற்ற 6-வது சுற்று போட்டியின் மாஸ்டர்ஸ் பிரிவில் ஈரானின் அமீன் தபதாபேயி, சகநாட்டைச் சேர்ந்த பர்ஹாம் மக்சூட்லூவுடன் மோதினார். இந்த ஆட்டம் 36-வது நகர்த்தலின் போது டிராவில் முடிவடைந்தது.

2-வது போர்டில் இந்திய கிராண்ட் மாஸ்டர்களான அரவிந்த்சிதம்பரம், அர்ஜுன் எரிகைசி பலப்பரீட்சை நடத்தினர். இதில் அரவிந்த் சிதம்பரத்திடம், உலகத்தர வரிசையில் இரண்டாவது இடம் வகிக்கும்அர்ஜுன் எரிகைசி 48-வது நகர்த்தலின்போது அதிர்ச்சி தோல்வியடைந்தார்.

பிரான்ஸின் மாக்சிம் வாச்சியர் லாக்ரேவ், செர்பியாவின் அலெக்ஸி சாரானாவுடனான ஆட்டம் 31-வது நகர்த்தலின் போது டிராவில் முடிவடைந்தது. 4-வது ஆட்டத்தில் இந்தியாவின் விதித் குஜ்ராத்தி, அமெரிக்காவின் லெவோன் அரோனியனுடன் மோதினார். இந்த ஆட்டம் 64-வது நகர்த்தலின் போது டிராவில் முடிவடைந்தது.

7 சுற்றுகள் கொண்ட இந்தத்தொடரில் 6 சுற்றுகளின் முடிவில்அர்ஜுன் எரிகைசி 4 புள்ளிகளுடன் முதலிடத்தில் தொடர்கிறார். லெவோன் அரோனியன் 4 புள்ளிகளுடன் 2-வது இடத்திலும், அரவிந்த் சிதம்பரம் 3.5 புள்ளிகளுடன் 3-வது இடத்திலும், அமீப் தபதாபேயி 3.5 புள்ளிகளுடன் 4-வது இடத்திலும், மாக்சிம் வாச்சியர் லாக்ரேவ் 2.5 புள்ளிகளுடன் 5-வது இடத்திலும், பர்ஹாம் மக்சூட்லூ 2.5 புள்ளிகளுடன் 6-வதுஇடத்திலும், விதித் குஜ்ராத்தி 2புள்ளிகளுடன் 7-வது இடத்திலும், அலெக்ஸி சாரானா 2 புள்ளிகளுடன் 8-வது இடத்திலும் உள்ளனர்.

சாலஞ்சர்ஸ் பிரிவில் லியோன் மென்டோன்கா சிறப்பாக விளையாடி கார்த்திகேயன் முரளியை வென்றார். 2-வது போர்டில் அபிமன்யு புராணிக்கை சிறப்பாக விளையாடி வைஷாலியை வீழ்த்தினார். ரனவுக்சத்வானி, ஹரிகா துரோணவல்லியுடனான ஆட்டம் டிராவில் முடிவடைந்தது. பிரணவ், பிரனேஷ் ஆகியோர் மோதிய ஆட்டம்35-வது நகர்த்தலின் போது டிராவில் முடிவடைந்தது.

சாலஞ்சர் பிரிவில் லியோன் மென்டோன்கா 4.5 புள்ளிகளுடன் 2-வது இடத்திலும், ரவுனக் சத்வானி 3.5புள்ளிகளுடன் 3-வது இடத்திலும், அபிமன்யு புராணிக் 3 புள்ளிகளுடன் 4-வது இடத்திலும், பிரனேஷ் 3 புள்ளிகளுடன் 5-வது இடத்திலும், கார்த்திகேயன் முரளி 2.5 புள்ளிகளுடன் 6-வது இடத்திலும், ஹரிகா துரோணவல்லி 1.5 புள்ளியுடன் 7-வது இடத்திலும், ஆர்.வைஷாலி 1 புள்ளியுடன் 8-வது இடத்திலும் உள்ளனர்.